Կառավարությանը դատի տվեք, և թող դատարանը որոշի` լեգիտի՞մ է եղել որոշումը, թե՞ ոչ. Կոնստանտին Օրբելյան
Այսօր` լրագրողների հետ հանդիպման ժամանակ, Օպերայի և բալետի ազգային ակադեմիական թատրոնի գեղարվեստական ղեկավար Կոնստանտին Օրբելյանը, խոսելով թատրոնի ու իր պաշտոնավարման շուրջ ստեղծված իրավիճակի մասին, հետևյալն է ասել.
«Հիմա ինձ թվում է, ինչ-որ թյուրիմացություն է կատարվում: Չգիտես ինչու Նազենի Ղարիբյանը որոշել է, որ իմ նշանակումը ոչ լեգիտիմ է: Մշակույթի նախարարությունը վերջին 8 կամ 9 ամիսների ընթացքում ինձ այդ մասին է ասում: Դա իմ հարցը չէ: Հարցնում եմ` ինձ ոչ լեգիտիմ նշանակել է նախարարությո՞ւնը, պատասխանն է՝ ո’չ, ասում եմ այդ դեպքում ո՞ր լեգիտիմությունն է ձեզ խառնաշփոթի մեջ գցել: Ասում են` եղել է կառավարության որոշում, որով դուք նշանակվել եք, ասում եմ, որ այդ դեպքում դուք խնդիր ունենք կառավարության հետ, կառավարությանը դատի տվեք, և թող դատարանը որոշի` լեգիտի՞մ է եղել որոշումը, թե՞ ոչ: Բայց, ամեն դեպքում, իմ պայմանագիրը ձեզ հետ լեգիտիմ է: Ես չեմ խնդրել, որ ինչ-որ մեկը ինձ լավություն անի, և որ դա լինի ոչ օրինական: Ես չեմ խնդրել, որ ինձ նշանակեն այդ պաշտոնին: Դա իմ կյանքի նպատակը չի եղել: Ես դա արել եմ, որ իրավիճակը փրկեմ և փորձեմ ինչ-որ բան անել: Ակնհայտ է, որ թյուրիմացություն է, և Ղարիբյանի խորհրդականներն այնքան էլ լավը չեն»:
Օրբելյանն ասել է, որ եթե ամեն բան լիներ այնպես, ինչպես Ղարիբյանն է ասում, ինքը աշխատանքից ազատված կլիներ 10 ամիս առաջ:
«Ճիշտ չէ՞, ինչո՞ւ սպասել: Ո´չ, նրանք սպասել են, նրանք ցանկանում էին, որ ես անձամբ գնամ, ես ասում էի, որ անձամբ չեմ գնա, որովհետև դա ինչպե՞ս բացատրեմ կոլեկտիվին, ինչո՞ւ ես հանկարծ պետք է ինքնս գնամ, թողնեմ կոլեկտիվը կամ չլինեմ տնօրեն, ինչո՞ւ, ի՞նչ հիմնավորմամբ, ես չեմ կարող դավաճանել իմ թատրոնը, էլ չեմ ասում այն մարդկանց դավաճանելու մասին, որոնք հույսեր ունեն ինձ հետ: Կա´մ դուք ինձ հեռացնում եք, կա´մ թողնում եք ինձ հանգիստ, երկուսից մեկը, և նա որոշեց ինձ հեռացնել պաշտոնից»,- հավելել է Կոնստանտին Օրբելյանը:
Հիշեցնենք, որ օրեր առաջ, երբ ՀՀ մշակույթի նախարարի պարտականությունները կատարող Նազենի Ղարիբյանը հյուրընկալվել էր «Հեռանկար»-ի տաղավարում, ասաց, որ խնդիրը շատ հաստակ է՝ եթե մարդը չի կատարում տնօրենի պարտականությունները, ինչու պետք է մնա այդ պաշտոնին: