Ինչ ուզում անում են, իրենց ձեռքում է, որ ուզենան խաբել, կխաբեն. վարորդները՝ ավտոգազի կիլոգրամով վաճառքի մասին
Հայաստանում որոշ գազալցակայաններ սկսել են ավտոգազը կիլոգրամով վաճառել։ Սակայն մեծ մասում շարունակում են նախկինի պես ծավալով վաճառքը։ NEWS.am-ի հետ զրույցում գազալցակայանների աշխատակիցներն ասացին, որ կիլոգրամի անցնելու համար իրենք սպասում են գրավոր հրամանի։
«Մեր մոտ դեռ ծավալով ենք վաճառում, բայց պատրաստված ենք, հրաման լինելուն պես կանցնենք կիլոգրամով վաճառքի»,– NEWS.am–ին ասաց Երևանի գազալցակայաններից մեկի աշխատակիցը։
Նույն պատկերն էր նաեւ մայրաքաղաքի մեկ այլ գազալցակայանում։ Աշխատակիցները հավաստիացնում են, որ գնային ոչ մի փոփոխություն չկա։
«Դեռ ծավալով ենք վաճառում եւ գնային ոչ մի փոփոխություն չի եղել։ Դեռ չգիտենք, որքանով արդյունավետ կլինի կիլոգրամի անցումը։ Դա միայն անցումից հետո կերեւա»,–ասաց գազալցակայանի տնօրենը։
«Զվարթնոց» օդանավակայանի հարեւանությամբ գործող «Ֆակել գազ» գազալցակայանում 10 օրից ավելի է՝ անցել են կիլոգրոմով վաճառքի։ Աշխատակից Սարգիս Իսպիրյանի խոսքով՝ եղել է համապատասխան ստուգում, որից հետո նոր թույլատրել են։
«Այն ժամանակ հաշվարկն արվում էր խորանարդով, հիմա արվում է կիլոգրամով։ Փոփոխությունը միայն մեր հաշվարկների մեջ է։ Գնայինն էլ համարյա նույնն է՝ մեծ գազաբալոնների դեպքում կարող է 100–150 դրամի տարբերություն տա, բայց այդ դեպքում էլ մի քիչ շատ են քշում»,–ասաց Իսպիրյանը։
Չնայած գազալցակայանների աշխատակիցների պնդմանը, որ ավտոգազը չի թանկացել, վարորդները հակադարձում են, որ կան տեղեր, որտեղ գազը թանկացել է։
Իսկ կիլոգրամով վաճառքին անցնելը, նրանց խոսքով, երաշխիք չէ, որ չեն խաբվի։
«Ինչ ուզում անում են, իրենց ձեռքում է, որ ուզենան խաբել կխաբեն։ Պետք է կշեռք լինի, որ նախքան լիցքավորումը մեքենան կշռես, մի հատ էլ լիցքավորելուց հետո կշռես։ Չնայած այդ ձեւով էլ կխաբեն։ Շուկայում, որ միրգ ես առնում, ո՞նց են խաբում, կշեռքը ցույց է տալիս 1 կգ, բայց 800 գրամ է»,–ասաց վարորդը։
Նշենք, որ ՏՄՊՊՀ նախագահի խորհրդական Գայանե Սահակյանն այսօր NEWS.am-ին տեղեկացրել էր, որ նկատի ունենալով բնական սեղմված գազի գնի փոփոխության վերաբերյալ այսօր մամուլում եւ սոցիալական ցանցերում տեղ գտած հրապարակումները, ինչպես նաեւ ՏՄՊՊՀ թեժ գծի միջոցով ստացված բողոքները, ՀՀ Տնտեսական մրցակցության պաշտպանության պետական հանձնաժողովը վերոնշյալ ոլորտում կիրականացնի ուսումնասիրություն: Նա նշել էր, որ Հանձնաժողովի վերջին վերլուծության համաձայն այս շուկայում գերիշխող տնտեսվարողներ չկան, դաշտը լիովին մրցակցային է՝ ցածր կենտրոնացվածությամբ: Այնումենայնիվ, կարեւորելով խնդրի սոցիալական նշանակությունը, ՏՄՊՊՀ նախագահ Արտակ Շաբոյանի որոշմամբ կիրականացվի օպերատիվ ուսումնասիրություն: Արդեն իսկ այսօր Հանձնաժողով կհրավիրվեն վերոնշյալ ոլորտում առավել խոշոր ծավալներ ունեցող տնտեսվարողները՝ իրավիճակի վերաբերյալ պարզաբանումներ ներկայացնելու նպատակով: Տնտեսվարողների փաստարկները ինչպես նաեւ փաստաթղթային հիմնավորումները ուսումնասիրելուց հետո, ՏՄՊՊՀ-ը կտեղեկացնի իր որոշման մասին:
Հիշեցնենք, որ փետրվարի 15–ի նիստում կառավարությունը հավանություն է տվել «ՀՀ հարկային օրենսգրքում փոփոխություն կատարելու մասին» օրենքի նախագծին, որով նախատեսվում է, որ ապրիլի 1–ից Հայաստանի ավտոգազալցկայաններում գազը պետք է վաճառվի քաշով, իսկ ակցիզային հարկը հաշվարկվի ծավալով։ Այս փոփոխությունը բացատրվում է ավտոգազալցակայաններում մեքենաները լիցքավորելիս ծավալի փոփոխության հաշվին գազի թերակշռման ռիսկը նվազագույնի հասցնելու անհրաժեշտությամբ։ Նիստին Նիկոլ Փաշինյանը նշեց, որ բազմաթիվ բողոքներ են ստանում մարդկանցից, որ տարբեր գազալցակայաններում գազի ծավալների հետ կապված կան տարբերություններ. «Այդ տարբերությունը կապված է խտության հետ: Հիմա գազը լցնում են ըստ ճնշման: Այսինքն՝ նույն քաշի գազը կարող է տարբեր ծավալներ ունենալ: Որպեսզի այս խնդիրը մենք լուծենք, ասում ենք, որ պետք է կիլոգրամով վաճառվի գազը սպառողին ու կգ-ով պետք է հարաբերությունները կարգավորվեն հարկային դաշտում»։