Գերմանացի լրագրողը հայց է ներկայացրել Մերկելի դեմ՝ Էրդողանի մասին բանաստեղծությունը քննադատելու համար
Գերմանացի լրագրող Յան Բյոմերմանը դատական հայց է ներկայացրել ԳԴՀ կանցլեր Անգելա Մերկելի դեմ՝ Թուրքիայի նախագահ Ռեջեփ Թայիփ Էրդողանի մասին իր երգիծական բանաստեղծությունը քննադատելու համար։ Հայցը Բեռլինի վարչական դատարանում կնայվի ապրիլի 16-ին՝ հաստատել է դատարանի ներկայացուցիչը։
Ձեւականորեն հայցը ուղղված է դաշնային կանցլերի աշխատակազմի դեմ եւ կազմված է երկու մասից։ Հիմնական մասում Բյոմերմանը պահանջում է, որ կանցլերին արգելեն հրապարակայնորեն կրկնել, թե իր բանաստեղծությունը «կանխամտածված վիրավորանք» է։ Եթե այդ պահանջը մերժվի, լրագրողը մտադիր է լրացուցիչ միջնորդությամբ պնդել, որ դատարանը հակաօրինական ճանաչի Մերկելի կողմից նրա մամուլի քարտուղար Շտեֆեն Զայբերտի հնչեցրած գնահատականը՝ հայտնում է DW-ը։
Դատարանի նեչկայացուցիչն ասել է, որ Բյոմերմանի հայցով վճիռը ապրիլի 16-ին արդեն կկայացվի։
Թուրքիայի նախագահի մասին «գոտկատեղից ներքեւ» կատակների օգտագործմամբ Բյոմերմանի երգիծական ստեղծագործությունը 2016թ․ մարտին հնչել էր թվային ZDFneo հեռուստաալիքի եթերում։ Ի պատասխան՝ Էրդողանը ԳԴՀ իշխանություններից պահանջել էր քրեական պատասխանատվության ենթարկել հաղորդավարին։ Թուրքիայի վարչապետ Ահմեդ Դավութօղլուի հետ հեռախոսազրույցում Զայբերտն ասել էր, թե Մերկելն այդ բանաստեղծութնյունը բնութագրել է որպես «կանխամտածված վիրավորանք»։ Ավելի ուշ Մերկելն այդ արտահայտությունը համարել էր սխալ՝ մեկնաբանելով, թե տպավորությունն այնպիսին է, որ տվյալ դեպքում նշանակություն ունի իր անձնական գնահատականը։