«ԱԱԾ-ի պաշտոնական հաղորդագրությունը ներկայացվել է որպես ապացո՞ւյց». Սեդրակ Քոչարյանի ներկայացուցիչ
Սեդրակ Քոչարյան ընդդեմ Արթուր Վանեցյանի գործով մարտի 28-ին տեղի ունեցած դատական նիստում պատասխանող կողմը դատարան է ներկայացրել տասներկու էջից բաղկացած ապացույցներ, որոնք ըստ էության տարբեր լրատվական կայքերում տեղ գտած հոդվածներ են եւ ԱԱԾ-ի կողմից 19.02.2019թ.-ին տարածած մեկ պաշտոնական հաղորդագրություն: Այս մասին նշել է Սեդրակ Քոչարյանի ներկայացուցիչ Անի Ալավերդյանը:
Նրա տարածած հայտարարության մեջ նաեւ ասվում է. «Ներկայացված ապացույցները, թե որ փաստական հանգամանքների ապացուցմանն են ուղղված՝ այս առնչությամբ պատասխանող կողմը հրաժարվել է պարզաբանել, իսկ դատարանը նիստը հետաձգել է, որպեսզի հայցվոր կողմը ծանոթանա վերոնշյալ ապացույցների հետ:
Անհրաժեշտ է նշել, որ դատարանը կրկին հայցվորի ներկայացուցչին հարցրել է՝ արդյո՞ք վերջինս համաձայն է պատասխանողի համաձայնությամբ փոխելու ոչ պատշաճ հայցվոր՝ Ազգային անվտանգության ծառայության տնօրեն Արթուր Վանեցյանին, թե ոչ: Սակայն, հայցվորի ներկայացուցիչը նշել է, որ սույն գործով պատասխանող է, ոչ թե Արթուր Վանեցյանը ի պաշտոնե, այլ որպես ֆիզիկական անձ:
Հիշեցնենք նաեւ, որ հայցվոր կողմի ներկայացուցիչ Անի Ալավերդյանը նախորդ դատական նիստի ընթացքում միջնորդություն էր ներկայացրել, որպեսզի պատասխանողը որպես վկա ցուցմունք տա սույն դատական գործի շրջանակներում՝ պարզելու համար արդյո՞ք Արթուր Վանեցյանն ասուլիսին հանդես էր եկել որպես ֆիզիկական անձ, թե ի պաշտոնե, սակայն դատանը մերժել է այս միջնորդությունը:
Ավելին, 21.02.2019թ.-ին պատասխանողը լրագրողներին հարցազրույց տալիս, նշել է հետեւյալը․ «Ես արել եմ հայտնի մամուլի ասուլիս ժամանակ, որից անմիջապես հետո, եթե չեմ սխալվում Վահեի (լրագրողի) հետ զրույցում ասել եմ, որ ուզում եմ հայտարարեմ, որ իմ խոսքը եղել է, ոչ այդքան ճիշտ ձեւակերպված, որի համար պարզաբանում եմ տվել: Այսինքն, ինչի համար դիմել են դատարան՝ ի սկզբանե ես դա հերքել եմ»: Հայցվորի այն հարցին, թե պատասխանողը վերոնշյալ արտահայտությունն անելիս ի՞նչ է նկատի ունեցել եւ արդյո՞ք ներկայացուցիչներին անհրաժեշտ է ժամանակ տրամադրել սույն հարցը իրենց վստահորդի հետ քննարկելու համար՝ պատասխանողի ներկայացուցիչները հրաժարվել են հետագա մեկնաբանություն տրամադրելուց:
Միեւնույն ժամանակ նշենք նաեւ, 19.02.2019թ.-ին ԱԱԾ-ի կողմից տարածած հայտարարությամբ, որըեւ պատասխանողի ներկայացուցիչը ներկայացրել է նախորդ դատական նիստի ընթացքում որպես ապացույց՝ խախտում է անմեղության կանխավարկածը, մասնավորապես՝ ՀՀ Սահմանադրության 66-րդ եւ Մարդու իրավունքների եւ հիմնարար ազատությունների պաշտպանության մասին Եվրոպական կոնվենցիայի 6-րդ հոդվածները, այն է «Յուրաքանչյուր ոք, ով մեղադրվում է քրեական հանցագործության մեջ, անմեղ է համարվում, մինչեւ որ նրա մեղավորությունը չապացուցվի օրենքին համապատասխան»: