Հռոմում պատերազմ են հայտարարել մեկանգամյա օգտագործման պլաստիկին եւ «բնապահպանական մաֆիային»
Հռոմի քաղաքապետ Վիրջինիա Ռաջին հայտարարել է, որ պատրաստվում է արգելել Հռոմում մեկանգամյա պլաստիկի՝ սպասքի, սննդի փաթեթների, բաժակների եւ այլ իրերի օգտագործումը: Բացի շրջակա միջավայրի մասին հոգ տանելուց, քաղաքապետարանը ցանկանում է ազատվել այսպես կոչված «բնապահպանական մաֆիայից»՝ հանցավոր խմբավորումներից, որոնք հարստանում են թափոնների ուտիլիզացման հաշվին, հաղորդում է «Եվրոպուլս»-ը:
Քաղաքապետարանը համարում է, որ եթե Հռոմում զգալիորեն պակասի աղբը (իսկ մեկանգամյա օգտագործման պլաստիկն այժմ կազմում է քաղաքի կենտրոնում աղբի 60 տոկոսը), «էկոմաֆիան» կկորցնի Հռոմի նկատմամբ հետաքրքրությունն ու ստիպված կլինի դադարեցնել իր գործունեությունը:
Հռոմից բացի «էկոմաֆիան» գործում է նաեւ Իտալիայի այլ շրջաններում: Դրանք մասնավոր ընկերություններն են, որոնք զբաղվում են թափոնների ուտիլիզացմամբ՝ փաստացի չպահպանելով անվտանգության ստանդարտներն ու նորմերը (օրինակ՝ չօգտագործելով անհրաժեշտ ֆիլտրերն աղբն այրելու ժամանակ):
Ավելին, «էկոմաֆիան» վարում է կոշտ քաղաքականություն մրցակիցների հետ պայքարում: Վերջին 4 ամիսների ընթացքում միայն Հռոմում երկու հրդեհ է բռնկվել ուտիլիզացման եւ վերամշակման գործարաններում: Դրանց հետեւանքով որոշ ժամանակ աղբը կուտակվում էր փողոցներում, իսկ քաղաքի բնակիչների շրջանում կար դժգոհություն: Դրան ի պատասխան՝ ընդունվեց մեկանգամյա պլաստիկ իրերի օգտագործման արգելքի մասին որոշումը: Արգելքը կարող է ուժի մեջ մտնել արդեն ընթացիկ տարում, եթե քաղաքային խորհուրդը հաստատի այն:
Եվրամիությունն արդեն պայքարում է պլաստիկից գոյացած աղբի դեմ: Օրերս Եվրախորհրդարանը հաստատել է մեկանգամյա օգտագործման իրեր կիրառելու արգելքը, որն ուժի մեջ կմտնի 2021 թվականին: Ալգելված կլինի մեկանգամյա ամբողջ սպասքը, ընպելիքի ձողիկները, մեկանգամյա սննդի տարաները եւ պլաստիկից այլ իրերը: Բացի այդ, 2030 թվականին ԵՄ-ում կվերամշակվի պլաստիկի ավելի քան 50 տոկոսը: