«Ամենայուղոտ» տարածքները շատ ցածր արժեքով գնվել են թաղապետերի, նրանց մերձավորների կողմից. Մարության
Յուրաքանչյուր վարչական շրջանում կան հողատարածքներ, «ամենայուղոտ» տարածքները, որոնք, այո շատ ցածր գներով գնվել են կոնկրետ թաղապետերի կամ իրենց մերձավորների կողմից: Այս մասին, այսօր՝ մարտի 28-ին, լրագրողների հետ զրույցում նշեց Երեւանի քաղաքապետ Հայկ Մարությանը:
Նրա խոսքով, ցավոք սրտի, այսօր, դրանք արդեն գրանցված են, սեփականության վկայականներ ունեն. «Այս պրեցեսը շարունակական է եղել, տեւել է 20 տարի: Այսօր կան ծրագրեր, որ մենք ուզում ենք իրականացնել եւ դրան խանգարում է այդ հանգամանքը: Մենք բանակցում ենք այդ մարդկանց հետ, որպեսզի, եթե մեզ պետք է մի հողակտոր ինչ-որ ծրագրի իրականացման համար, որ զիջեն այդ հողը մեզ, մենք իրենց համանման հող մեկ ուրիշ տեղ տանք: Ցավն այն է, որ սեփականաշնորհվել են նաեւ այգիների տարածքներ, որն ամենադաժանն է: Այդ այգիների տարածքում գալիս են մարդիկ եւ փորձում են շինարարության թույլտվություն ստանալ, որը մենք, բնականաբար, մերժում ենք»,-ասաց Մարությանը՝ հավելելով, որ այդպիսի հողատարածքներ կան Նոր Նորքի այգում, Դավիթաշենի այգում:
«Գրեթե բոլոր այգիներում կան սեփական հողեր: Տարբեր մարդկանց են պատկանում: Իրենք խելացի են գտնվել, իրենց անունով չեն գրել, ինչ-որ բարեկամի, ընկերոջ անունով են գրել»,-ասաց նա:
Հարցին, թե արդյոք քաղաքապետարանը չի փորձում պարզել այդ հողատարածքների ձեռքբերման օրինականությունը, Հայկ Մարությանը պատասխանեց. «Քանի որ տարածքները շատ են, Երեւանը բավականին մեծ քաղաք է, գործընթացը երկար է տեւում: Այո, այդպիսի պրոցես կա, մենք դատախազության հետ համատեղ աշխատում ենք: Այսինքն սկսել ենք այգիներից, գուքագրում ենք այգիները եւ դատախազության հետ նայում ենք, թե ինչ հիմքերով են տրվել, վաճառվել: Կտեսնենք արդյունքները: Սա ավելի շատ քննչական մարմինների դաշտում է: Երբ տեսնում ենք տաօրինակություն, միանգամից փոխանցում ենք իրավապահ մարմիններին»: