Իտալացի երգիչ Ալ Բանոն հայտնվել է Ուկրաինայի «սև ցուցակում»
Ուկրաինայի մշակույթի նախարարությունն իտալացի հայտնի էստրադային երգիչ Ալ Բանոյին (իրական անունը՝ Ալբանո Կարրիզի) ներառել է «սև ցուցակում», գրում է ilmessaggero.it-ը:
Ուկրաինայի իշխանությունների կարծիքով՝ հայտնի Felicità երգի կատարողը «սպառնալիք է ներկայացնում երկրի ազգային անվտանգությանը»: Իշխանությունների նման որոշման պատճառները պարզ չեն, ինչպես նաև պարզ չեն նման քայլի հնարավոր հետևանքները, սակայն կայքը հստակեցնում է, որ որոշման պատճառը կարող է լինել այն, որ Ալ Բանոն ժամանակին արդարացրել է Ղրիմի միացումը Ռուսաստանին:
«Հավատացնում եմ՝ ինձ համար դա ասես խաղաղ երկնքում կայծակ լիներ: Ես ինքս խաղաղասեր մարդ եմ... Ես ասել եմ միայն այն, ինչ բոլորն են ասում: Ի՞նչ անենք, բոլորին արգելե՞նք Ուկրաինա մուտք գործել: Ես ազատ մարդ եմ, և չեմ պատկերացնում, թե ինչու պետք է իմ մուտքն Ուկրաինա արգելեն մի բանի համար, որն ասելը բնական է»,- մեկնաբանել է 75-ամյա երգիչը:
Հայտնի է, որ ներկա պահին Ուկրաինայի «սև ցուցակում» 147 արտիստ կա, որոնց թվում Ալ Բանոն 48-րդ համարն է:
Ցուցակում ընդգրկվել են նաև ռուս ռեժիսոր Նիկիտա Միխալկովը, հոլիվուդյան դերասան Սթիվեն Սիգալը, ֆրանսիացի դերասան Ժերար Դեպարդիեն, իտալացի դերասան և ռեժիսոր Միկելե Պլաչիդոն, այլք: