ՀՀԿ-ն փչացնում է նաեւ ուսանողներին. լավ, ո՞րն է ձեր նպատակը
Օրերս փաստացի ապացույցներ հրապարակվեցին, որ ՀՀԿ-ն օգտագործելով վարչական լծակները՝ համատարած կերպով ստիպում է հանրակրթական դպրոցների և մանկապարտեզների տնօրեններին մարդկանց ցուցակագրել ու իշխող կուսակցության համար ձայներ ապահովել։ Դրանով, սակայն, ՀՀԿ-ն չի սահմանափակվում․ կեղծիքների է դիմում նաև սոցիալական ցանցերում։ Ֆեյքերից, փողով ստատուսներ գրողներից, սուտի ընդդիմադիրներից բացի նաև «լայք» դնողների խմբեր է պահում, որոնց, հանրակրթական դպրոցների և մանկապարտեզների տնօրենների նման, ստիպում են «լայքել» այս կամ այն ՀՀԿ-ականի գրառումը՝ ընդհանուր ֆոն ստեղծելով, թե իշխող կուսակցությանն ատողներն իրականում այդքան էլ շատ չեն։ Ընդ որում՝ «լայք» դնող այդ խմբերը ԲՈՒՀ-երի ուսխորհուրդների շրջանակներում են կազմակերպվում: Ուսանողներին ՖԲ փակ խմբերում են ընդգրկում և «ինստրուկտաժ» անում:
«7օր»-ին հաջողվել է ՀՀԿ-ի վրա աշխատող Մանկավարժական ինստիտուտի փակ խմբից մի գրառում արձանագրել (այն մեզ են ուղարկել այդ փակ խմբում զոռով ընդգրկված ուսանողները), որում Լալա Սահակյան անունով օգտատերը այդ խմբի մասնակիցներին հրահանգում է մտնել և «լայքեր» դնել ՀՀԿ-ական Կարեն Ավագյանի գրառումների տակ։
«Երեխեք մտնում եք բոլորդ անխտիր Կարեն Ավագյանի էջ ու վերջին 2 գրառումները լայքում եք ու չասեք, որ մենք դրա հետ կապ չունենք, ասվումա, պիտի արվի, ցուցակովա, արագ արեք ու պլյուսները դրեք մտնեմ ստուգեմ»,- ուղղագրական ու կետրադրական սխալներով գրառմամբ խիստ հրահանգում է Լալա Սահակյանը և կից հրապարակում Կարեն Ավագյանի ֆեյսբուքյան էջի հղումը։
Հրամանը ստանալուց հետո մյուս օգտատերերը հերթով մտնում են Կարեն Ավագյանի էջ, հավանում նրա վերջին 2 գրառումները, իսկ փակ խմբում պլյուսները դնում, որ իրենց անվան դիմաց էլ պլյուսը ստանան՝ որպես հնազանդ կամակատարի։
Հավելենք նաև, որ Կարեն Ավագյանը վերջին այդ 2 գրառումներով մեջբերել էր Սերժ Սարգսյանի խոսքերը, որոնք, ինչպես նրա մյուս բոլոր մտքերը, իրականությունից կիլոմետրերով հեռու են և հաստատ չեն կարող հավանության արժանանալ օգտատերերի կողմից։ Բայց արի ու տես, որ «ֆեյք» գելլափների հեղինակների ստեղծած փակ էջերում հրահանգներ տալու և ստիպողաբար լայքեր կորզելու արդյունքում՝ Սերժ Սարգսյանի այդ խոսքերն ստացել են 240-ից և 190-ից ավելի հավանումներ ու այդ թիվը գնալով ավելանում է։
Փաստորեն, իշխող կուսակցությունը՝ ՀՀԿ ղեկավար Սերժ Սարգսյանի խոսքերին հավատարիմ, ոչ միայն բուն ընտրատեղամասերում է թիվ խփում, այլ նաև՝ վիրտուալ աշխարհում, ու այդ եղանակով ապահովում իր կեղծ անվտանգությունն ու առաջընթացը։
Հ․Գ․ Վերոնշյալ գրառումից ժամեր անց նույն Լալա Սահակյանն է՛լ ավելի խիստ տոնով ու կրկին ուղղագրական և կետադրական սխալներով հերթական գրառումն է կատարել՝ նշելով․ «Էրեխեք նորից եմ ասում մտնում եք կարեն ավագյանի էջ ու վերջին արդեն 3 գրառումները լայքում եք․․․ ով արել ա էլ + մի դրեք ձեր ցուցակն արդեն սարքել եմ մնացած 22 հոգուն եմ սպասում եմ․․ արագ անում եք ու + եք դնում»։
Շարմազանովն այդպես էլ չհասկացավ, թե ինչ էր ասում դեսպանը
Դուք փողը տվեք եւ մի կողմ քաշվեք, իսկ մենք ինչ կուզենք, այն էլ կանենք
Ինչու ՀՀԿ-ում լարվածություն չկա
ՀՀԿ-ի երազած Հայաստանն այսպիսին է (Տեսանյութ)
ՀՀԿ-ում սուր պայքար է. նույն պաշտոնին երեք մարդ է հավակնում, այդ թվում Միհրան Պողոսյանը