Մակրոնը, Մերկելը, Յունկերը եւ Ցզինպինը կհանդիպեն Փարիզում
Ֆրանսիայի նախագահ Էմանուել Մակրոնը իր չին գործընկեր Սի Ցզինպինի եւ Գերմանիայի կանցլեր Անգելա Մերկելի հետ կլիմայի եւ առեւտրի վերաբերյալ բանակցություններ կանցկացնի:
Առաջնորդներին կմիանա Եվրահանձնաժողովի նախագահ Ժան Կլոդ Յունկերը, որը կփորձի «մերձեցման կետեր գտնել Եվրոպայի եւ Չինաստնաի միջեւ», հաղորդում է AFP-ն՝ վկայակոչելով Ֆրանսիայի նախագահի վարչակազմին: Հանդիպումը տեղի կունենա մարտի 26-ին:
Աղբյուրի համաձայն՝ հանդիպումը հնարավորություն կտա բացատրել Չինաստանին Եվրոպայի ռազմավարությունը:
«Մենք կարծում էինք, որ դա անհրաժեշտ է, քանի որ բազմակողմանիության պաշտպանությա համար բանավեճը պետք է եվրոպական, այլ ոչ թե ֆրանսիական մակարդակի տեղափոխվի», - նշել են վարչակազմում:
Հանդիպումը կկայանա ԵՄ-Չինաստան գագաթնաժողովի նախաշեմին, որը տեղի կունենա ապրիլի 9-ին Բրյուսելում:
ԵՄ-ն տարակարծիք է Չինաստանի նկատմամբ վերաբերմունքի հարցում. ոմանք վախենում են համաշխարհային գերտերության հզորացումից, իսկ մյուսները՝ հատկապես Եվրոպայի հարավում, պատրաստ են գործարքներ կնքել չինական ներդրումների ներգրավվման նպատակով:
Սպասվում է, որ իր ուղեւորության ընթացքում Սի Ցզինպինը Իտալիայի հետ չինական «Մեկ գոտի, մեկ ճանապարհ» նախաձեռնությանը միանալու մասին հուշագիր կստորագրի:
Հունաստանը եւ Լեհաստանը նույնպես միացել են նախաձեռնությանը, սակայն ԵՄ մյուս անդամները մտավախություն ունեն, որ դա կարող է հանգեցնել մայրցամաքի քաղաքականության վրա Պեկինի ազդեցության ուժեղացմանը:
Չինական «Մեկ գոտի, մեկ ճանապարհ» նախաձեռնությանը «Մետաքսի ճանապարհի տնտեսական գոտու եւ XXI դարի ծովային Մետաքսի ճանապարհի» միացյալ նախագծերի առաջարկություն է:
Տվյալ չինական նախաձեռնության էությունը կայանում է միջազգային համագործակցության ձեւավորման եւ զարգացման նոր մոդելի որոնման մեջ՝ առկա տարածաշրջանային երկկողմ եւ բազմակողմ մեխանիզմների եւ Չինաստանի մասնակցությամբ փոխգործակցության կառույցների ամրապնդման միջոցով:
Հնագույն Մետաքսի ճանապարհի զարգացման ոգով եւ շարունակության հիմքի վրա՝ «Մեկ գոտի, մեկ ճանապարհը» կոչ է անում տարածաշրջանային տնտեսական գործընկերության նոր մեխանիզմների ստեղծմանը, ներգրավված երկրների տնտեսական բարգավաճման խթանմանը, մշակութային փոխանակումների եւ տարբեր քաղաքակրթությունների միջեւ բոլոր ոլորտներում կապերի ամրապնդմանը, ինչպես նաեւ խաղաղության եւ կայուն զարգացման աջակցությանը: Չինաստանի պաշտոնական տվյալներով՝«Մեկ գոտի, մեկ ճանապարհը» ընդգրկում է Եվրասիայի մեծ մասը՝ միացնելով զարգացող երկրները, այդ թվում նոր տնտեսությունները եւ զարգացած երկրները: