Գերմանացին դատապարտվել է ցմահ ազատազրկման՝ տարիներ շարունակ իր գործընկերներին թունավորելու համար
Գերմանիայում ցմահ ազատազրկման է դատապարտվել քաղաքացի, որը տարիներ շարունակ թունավորել է իր իսկ գործընկերներին:
Ինչպես գրում է REGNUM–ը, տղամարդն աշխատել է ARI Armaturen ընկերությունում: Պարզվել է, որ նա կասկածելի փոշի է լցրել իր գործընկերներից մեկի բրդուճի մեջ: Հետաքննության ընթացքում կասկածյալի տանը հայտնաբերվել են ծանր մետաղներ և դրանց միացություններ. սնդիկ, կապար, կադմիում, կապարի ացետատ:
Ըստ հետաքննության՝ հանցագործը ցանկանում էր տեսնել, թե ինչպես են այդ նյութերն ազդում իր գործընկերների վրա:
Պարզվել է նաև, որ տվյալ ընկերությունում 2000 թվականից սկսած սրտի կաթվածի ու քաղցկեղի պատճառով մահացել է 21 մարդ: Ոստիկանությունում վստահ են, որ այդ դեպքերը կարող են կապված լինել ծանր մետաղներով թունավորումների հետ:
Ներկա պահին ընկերության աշխատակիցներից մեկը շարունակում է մնալ կոմայի մեջ, ևս երկուսը երիկամների լուրջ վնասվածքներ ունեն: