Ռուսաստանում քրեական հեղինակությունների դեմ պայքարի խստացումից հետո բազմաթիվ «օրենքով գողեր» կարող են հաստատվել այլ երկրներում
ՌԴ Քրեական օրենսգրքում քրեական հեղինակությունների դեմ պայքարը խստացնելուն ուղղված նոր հոդված կհայտնվի, որի ի հայտ գալուն ակտիվորեն պատրաստվում են թե՛ իրավապահ մարմինները, թե՛ հենց իրենք՝ «օրենքով գողերը», գրում է ռուսական «Ռոսբալտ» գործակալությունը՝ հղում անելով իր աղբյուրներին:
Նշվում է, որ նոր օրենքը նախատեսում է խիստ վերահսկողություն քրեական հեղինակություն համարվող անձանց նկատմամբ, այդ թվում՝ հեռախոսային գաղտնալսումների իրականացում:
Առաջինը թիրախում կհայտնվեն այն «գողերը», որոնք վերահսկում են գրպանահատների, բնակարանային կամ մեքենաների սրահներից գողություն կատարողների խմբերին: Գիտակցելով նոր իրավիճակը՝ ենթադրվում է, որ այս քրեական հեղինակություններից շատերը կարող են լքել երկիրն ու շարունակել ղեկավարել իրենց հանցավոր խմբերն արտասահմանից: Հայտնի է, որ նման նախադեպ արդեն կա, և որոշ «օրենքով գողեր» նման կերպ գործում են Թուրքիայի, Ադրբեջանի և Իտալիայի տարածքներից:
Որոշներն էլ շտապ կերպով փորձում են ձևակերպել կենսաթոշակային վկայականներն ու աշխատանքային գրքույկները՝ եկամուտները հաստատելու համար:
Քրեական հեղինակությունների մեկ այլ խումբ են խոշոր ու ազդեցիկ ընկերությունների հիմնադիրները, որոնք ունեն պաշտոնական մեծ եկամուտներ: Ըստ աղբյուրի՝ նման «օրենքով գողերի» «հասնելը» բարդ կամ նույնիսկ անհնարին կլինի՝ նույնիսկ անմիջական հսկողության կամ հեռախոսային գաղտնալսումներ կիրառելու դեպքում: