«Լիդիան Արմենիան» ի սկզբանե բնապահպանական անհրաժեշտ միջոցառումները չի արել, հիմա փորձում է վնասը գցել պետության վրա
«Լիդիան Արմենիա» ընկերությունը փորձում է բոլոր վնասները գցել պետության վրա, դա իրենց գործելաոճն է, ողջ շինարարության փուլում իրենք փնտրել են մեղավորներ, և բոլորը մեղավոր են, բացի իրենցից. այս մասին լրագրողների հետ զրույցում ասաց Ջերմուկի բնակիչ, Ամուլսարի շահագործման դեմ ակտիվիստ Շիրակ Բունիաթյանը:
Հիշեցնենք, որ օրերս «Լիդիան Արմենիա» ընկերությունը հայտարարություն էր տարածել, որում ասվում էր, որ 2018-ի հունիսից ի վեր Ամուլսարի ճանապարհների շրջափակման հետևանքով ընկերությունը հնարավորություն չի ունեցել վերսկսել աշխատանքները հանքի տեղամասում: Նշվել էր, որ ընկերությունը չի կարողացել իրականացնել ոչ միայն շինարարական աշխատանքներ, այլ նաև կառուցել բնապահպանական պաշտպանիչ համակարգեր՝ առատ տեղումների և գարնանային ձնհալքի հետևանքով էրոզիան և մակերևութային ջրերում նստվածքները կառավարելու նպատակով, ընկերության ունեցած պարտավորությունների և թույլտվությունների պայմանների համաձայն։
Բունիաթյանի խոսքով՝ այնտեղ կարող են վտանգներ լինել ձնհալի հետ կապված: «Այս պահին ոչ ոք չի կարող գնահատել, թե այդ վտանգներն ինչպիսին կլինեն, քանի որ եղել է ընկերության կողմից միջամտություն: Ամուլսարում հազար տարիներ ձյուն է եկել, հալել գնացել է, բայց այս պահին իրենց արած հողային տեղափոխությունների, որոշ չափով ընդերքից հանված շինանյութերի պատճառով կարող են առաջանալ լճակներ, որոնք կարող են բացվել և մեծ վնասներ պատճառել»,- ասաց ակտիվիստը:
Ջերմուկի բնակիչներից Էդմոն Աղաբեկյանն էլ նշեց, որ Գնդեվազ համայնքի ջուրը մեկ ամսվա ընթացքում մի քանի անգամ ցեխաջուր է եղել, երբ ընկերության ներկայացուցիչներին տեղյակ են պահել, ասել են՝ իրենք չեն պատասխանատու, կապալառու ընկերությունն է պատասխանատու:
«Կավաջուրը լցվում է Արփա գետ, նորից ասում են, որ իրենք չեն մեղավոր կապալառուն է մեղավոր, այս դեպքում էլ ճանապարհ փակողների վրա է գցում մեղքը»,- ասաց նա:
Հայկական բնապահպանական ճակատի անդամ Լևոն Գալստյանի խոսքով՝ նրանք 2010 թվականից են թույլտվություն ստացել հանք շահագործելու, բայց անընդհատ հետաձգել են, հիմա են որոշել այդ աշխատանքներն անել: Նա հարց բարձրացրեց, եթե 2010 թվականից թույլտվություն ունեն՝ ինչո՞ւ պատշաճ աշխատանքներ չեն իրականացնել: «Ջերմուկում, երբ հանդիպեցին վարչապետի հետ «Լիդիան Արմենիայի» ներկայացուցիչներն ասացին, որ 80 տոկոս աշխատանքներն իրականացված է, բայց եթե նրանք չեն արել բնապահպանական աշխատանքներ, ապա ի՞նչ են արել, ինչ աշխատանքների մասին է խոսքը»,- նշեց նա և հավելեց, որ հիմա պետք է նախապատրաստական բոլոր աշխատանքները վերջացրած լինեին, որ ձնհալի ժամանակ խնդիրներ չառաջանային:
«Ո՞վ է սրա համար պատասխանատու: Ասում են՝ կառավարությունը: Ինչո՞ւ է կառավարությունը պատասխանատու, այս ամեն ինչն իրենց գործունեության կամ անգործության հետևանք է և ոչ մի կապ չունի ճանապարհ փակելու հետ»,- հավելեց նա:
Ըստ նրա՝ բնապահպանական միջոցառումները, աշխատանքները չպետք է իրականացվեն ամենավերջում: «Եթե դու ի սկզբանե չես արել բնապահպանական անհրաժեշտ միջոցառումները, ասում ես՝ հիմա էի ուզում անել, բայց ինձ չթողեցին, դա պարզ մանիպուլյացիա է»,- ասաց Գալստյանը:
Հարցին՝ հնարավո՞ր է միաժամանակ հանքարդյունաբերությամբ զբաղվել, բայց չառաջանան բնապահպանական խնդիրներ, նա պատասխանեց. «Ամուլսարի տարածքում արդյունաբերությունը անթույլատրելի է, որովհետև բազմակի ռիսկեր ունի, ես չեմ ուզում խոսել այդ ռիսկերի մասին, դրանց մասին շատ է սրվել: Առհասարակ սարերի շահագործումը կարող է խաչ քաշել Հայաստանի վրա»,- շեշտեց Լևոն Գալստյանը: