«Պետական մակարդակով բիզնես են խլում». տնտեսվարողը մեղադրում է Դավիթ Սանասարյանին
«Հետք» էլեկտրոնային պարբերականը գրում է.
««Ֆրեզենիուս Մեդիքլ քեյր» գերմանական ընկերության հայաստանյան գործընկեր «Ֆրեզեն» ՍՊԸ-ի տնօրեն Հրանտ Պիվազյանը պնդում է, որ պետական վերահսկողական ծառայությունը փորձում է խոչընդոտել իրենց ընկերության գործունեությունը:
Հրանտ Պիվազյանը «Հետք»-ի թղթակցին պատմեց, որ 1997 թ.-ից իր հոր՝ Վարազդատ Պիվազյանի կողմից Հայաստանի ողջ տարածքում և Արցախում հիմնադրվել են հեմոդիալիզի բաժանմունքներ: «Ֆրեզենիուս Մեդիքլ քեյր» ընկերությունը, առանց նախապայմանների, բուժհաստատություններին նվիրաբերել է ավելի քան 150 սարքավորում: Հրանտ Պիվազյանի խոսքով` այսօր փորձում են իրենց «բիզնեսը խլել»: Նա մեզ ներկայացրել է գործընթացը հավաստող մի շարք փաստեր և դրանց հետ կապված իրադարձությունների ժամանակագրությունը:
2019 թ.-ի հունվարին Վանաձորի ԲԿ-ն հայտարարել է հեմոդիալիզի պարագաների մրցույթ, սակայն պետական վերահսկողական ծառայության (ՊՎԾ) գնումների վերահսկման վարչության պետի ժամանակավոր պաշտոնակատարի Սամվել Ադյանը Լոռու մարզպետարանի համապատասխան պաշտոնյային առաջարկել է նշված մրցույթում կատարել փոփոխություններ: Առաջարկվել է 5 չափաբաժնից 3-ում մանրազերծման մեթոդը փոփոխության ենթարկել: Բացի դա, առաջարկվել է փոփոխության ենթարկել նույն բժշկական կենտրոնի մեկ այլ մրցույթի 1 չափաբաժնի տեխնիկական բնութագիրը:
Լոռու մարզպետարանի առողջապահության և սոցիալական ապահովության վարչության պետի ժ/պ Արթուր Մխիթարյանը պատասխանել է ՊՎԾ պաշտոնյային, որ «Ֆրեզեն» ընկերության կողմից առաջարկվող ապրանքները ունեն բարձր որակ և հուսալիություն, սարքավորումները գտնվում են երաշխիքի մեջ, իսկ այլ պարագաների օգտագործումն այս փուլում նպատակահարմար չէ: Մարզպետարանի պաշտոնյային նույն տեղեկությունը տրամադրել է նաև Վանաձորի ԲԿ-ի տնօրեն Վ. Մկրտչյանը:
Պետական վերահսկողական ծառայության գնումների վերահսկողության վարչության պետ Սամվել Ադյանը մեկ օր անց նույնաբովանդակ գրություն է ուղարկել «Սուրբ Գրիգոր Լուսավորիչ» ԲԿ՝ առաջարկելով հեմոդիալիզի պարագաների համար հայտարարված մրցույթի 4 չափաբաժնում փոփոխություն կատարել:
«Ֆրեզեն» ՍՊԸ-ի տնօրենը հասկանալու համար, թե ինչ դավադրություն է նախապատրաստվում, փորձել է կապ հաստատել ՊՎԾ ներկայացուցիչ Սամվել Ադյանի հետ, որը հանդիպելու առաջարկը մերժել է, սակայն իմանալով, որ տնտեսվարողը վարչապետ Նիկոլ Փաշինյանին է պատրաստվում դիմել` համաձայնել է: «Մեր հեռախոսազրույցից մի քանի օր անց ինձ զանգահարեց իմ ծանոթը և ասաց, որ ցանկանում է ինձ հետ հանդիպել և զրուցել այս թեմայի շուրջ: Հանդիպեցի մեր ընդհանուր ծանոթին՝ Տարոն Ավետիսյանին՝ առաջարկելով պարզաբանել, թե ինչին են միտված կոնկրետ այս փոփոխությունները: Տարոն Ավետիսյանը պատասխանեց ինձ. «Ուշ թե շուտ իմանալու ես, ավելի լավ է միանգամից ասեմ, որ հիմա մեր հերթն է եկել ներկրելու հեմոդիալիզի պարագաներ...»»,- հանդիպումից մանրամասներ հայտնեց ընկերության տնօրենը:
ՊՎԾ մեկ այլ աշխատակից էլ՝ Գևորգ Խաչատրյանը, փորձում է բուժհաստատությունների ղեկավարներին համոզել, որ տեխնիկական բնութագրերը փոփոխեն: «Սուրբ Գրիգոր Լուսավորիչ» ԲԿ-ն փոփոխում է տեխնիկական բնութագրերը: Հիվանդանոցի հայտարարած մրցույթին մասնակցում է «Զորաշեն» ՍՊԸ-ն, որը, armeps.am համակարգի տվյալներով, տարիներ շարունակ պետական հաստատություններին կահույք է մատակարարել, Երևանի կամարանցումներն (դալան) է նկարազարդել և այլն: Նշված ՍՊԸ-ն, հաղթելով մրցույթը, երկրորդ փուլում ներկայացրել է մատակարարվելիք պարագաների տեխնիկական բնութագրերը: Այդ ժամանակ էլ պարզվել է, որ ներկայացված ապրանքները մանրազերծված են ռադիացիոն բետտա եղանակով, որը համարվում է մրցույթի խախտում: «Հեմոդիալիզի բժշկական պարագաները, օրինակ՝ արյան հոսքային գծերը, մետաղական գործիքները, որոնք որոշակիորեն կարծր են, կարող են մանրազերծվել գամմա կամ բետտա մեթոդով, սակայն կոնկրետ հեմոդիալիզատորում պարունակվող մանրաթելային հյուսվածքների պարագայում գամման և բետտան վնասում են այդ հյուսվածքների կառուցվածքը և բերում դիսֆունկցիայի ու բացասական ազդեցություն ունենում մարդու կյանքի և առողջության վրա»,- բացատրում է «Ֆրեզեն» ընկերության տնօրենը:
Հետագայում «Սուրբ Գրիգոր Լուսավորիչ» ԲԿ-ի մրցույթի տեխնիկական բնութագիրը կրկին փոփոխում են և հարմարեցնում «Զորաշեն» ՍՊԸ-ի ներկայացրած ապրանքների բնութագրերին:
Վանաձորի ԲԿ-ի մրցույթը կասեցնելու յուրահատուկ հնարք են բանեցնում: Կոտայքի մարզի Գառնի գյուղի մի բնակիչ, որը, ինչպես մեզ հաջողվեց պարզել, արտագնա աշխատանքի մեկնող է, դիմում է ներկայացնում «Գնումների աջակցման կենտրոն» ՊՈԱԿ՝ պահանջելով կասեցնել Վանաձորի ԲԿ-ի հայտարարած մրցույթը և տեխնիկական բնութագրերում փոփոխություն կատարել:
Այս պատկերն ամբողջանում է, երբ պետական վերահսկողական ծառայության ղեկավար Դավիթ Սանասարյանի հրամանով, արդեն փետրվար ամսին «Սուրբ Գրիգոր Լուսավորիչ» ԲԿ-ում ստուգումներ են սկսվում կոնկրետ հեմոդիալիզների պարագաների գնման գործընթացում: ՊՎԾ-ն պահանջում է հիվանդանոցից նշված հարցին վերաբերող 2016-2018 թթ-ին կնքված պայմանագրերը, հանձնման ընդունման ակտերը և այլն:
«Ֆրեզեն» ընկերության տնօրենը բացատրում է, որ հեմոդիալիզի սարքավորման վրա այլ սարքավորումներ տեղադրելը վտանգավոր է մարդկանց առողջության համար, քանի որ նշված սարքավորմանը կարելի է միացնել բացառապես նույն ընկերության սարքավորումները, քանի որ հիմնական սարքի աշխատանքը կարող է խափանվել և անդառնալի հետևանքներ առաջացնել: Նա նաև ստացել է «Ֆրեզենիուս Մեդիքլ քեյր» ընկերության գրությունը, որով չի երաշխավորվում անխափան աշխատանքը` ընկերության հիմնական սարքավորմանը այլ սարքավորումներ միացնելու դեպքում:
«Ֆրեզեն» ընկերության տնօրեն Հրանտ Պիվազյանը խնդիրը ներկայացնելու համար հանդիպել է վարչապետի խորհրդական Արսեն Գասպարյանին, սակայն վստահ չէ, որ խնդրով զբաղվում են: Հարցին՝ վստա՞հ եք, որ Դավիթ Սանասարյանը տեղյակ է իր ենթակաների գործողությունների իրական նպատակների մասին, Պիվազյանը դրական պատասխան տվեց: Նա պատրաստվում է Հայաստանում Գերմանիայի դեսպանին էլ ներկայացնել խնդիրը, քանի որ գերմանական ընկերության հայաստանյան ներկայացուցչությունը պետական մակարդակով խնդիրների է բախվում, սակայն մինչև դիմելը, ցանկանում են հանդիպել վարչապետին:
Մանրամասները՝ սկզբնաղբյուր կայքում