10 000 դոլար նրանց, ովքեր կտեղափոխվեն և երեխա կունենան իտալական այս քաղաքում
Իտալիայի հյուսիսային Պիեմոնտ մարզում գտնվող Լոկանա գեղատեսիլ բնակավայրի իշխանությունները բնակչության թվի նվազումից, ինչպես նաև բնակավայրի ամայացումից խուսափելու համար 10 000 դոլար են առաջարկում այն ընտանիքներին, որոնք կհամաձայնեն տեղափոխվել այնտեղ և երեխա ունենալ, գրում է Daily Mail-ը:
Բնակավայրի քաղաքապետը՝ Ջովաննի Բրունո Մատիեն, նախ այս առաջարկով դիմել է Իտալիայում բնակվող իտալացիներին և օտարերկրացիներին, ապա, արձագանք չգտնելով, միջազգային հանրությանը:
Բնակչության կրճատման պատճառով լեռնային այս գողտրիկ բնակավայրում փակվել են շատ ռեստորաններ, խանութներ, բարեր, տեղի միակ դպրոցը նույնպես փակվելու վտանգի տակ է:
Հայտնի է, որ նախորդ դարի սկզբում Լոկանայի բնակչությունը ավելի քան 7000 է եղել, իսկ ներկայում այնտեղ 1500-ից պակաս մարդ է ապրում:
Վերջին շրջանում Իտալիայում մի շարք բնակավայրեր հանդես էին եկել նման առաջարկներով. դրանց նպատակը նույնն է՝ հնարավորինս շատ մարդ գրավել դեպի դատարկվող քաղաքներ:
Ցածր հարկերը, էժան ծառայությունները, տների մատչելի գները, կյանքի բարձր որակն ու բնությանը մոտ լինելու հեռանկարը շատ օտարերկրացի թոշակառուների համար այս վայրերն իդեալական են դարձնում: