Պուտինն Օմսկի 12-ամյա բնակչուհուն չմուշկներ է նվիրել
Ռուսաստանի Դաշնության նախագահ Վլադիմիր Պուտինն Օմսկի 12-ամյա բնակչուհուն չմուշկներ է նվիրել, պարզվում է՝ աղջիկը ոտքի չափազանց մեծ չափսի պատճառով երկար ժամանակ չի կարողացել իրեն հարմար չմուշկներ գտնել:
Ինչպես գրում է lenta.ru-ն, 7-րդ դասարանի աշակերտուհին շատ էր ցանկանում գեղասահքով զբաղվել, սակայն 41-րդ համարի կոշիկ հագնող աղջկա համար բավականին բարդ է եղել իր ոտքի չափսին համապատասխան չմուշկներ գտնել: Տեսնելով հեռուստացույցով, թե ինչպես են մյուս դպրոցականները նվերներ ստանում Պուտինից, աղջիկը որոշել է նամակ գրել նախագահին ու իր համար նույնպես նվեր խնդրել:
«Ես շատ էի ցանկանում չմուշկներ ունենալ, սակայն իմ ոտքի համարը 41 է, և ընտանիքիս անդամները չեն հասցնում ինձ համար չմուշկներ գնել: Տատիկս կատակով խորհուրդ տվեց ինձ նամակ գրել նախագահին, ես այդպես էլ արեցի: Անգամ չէի մտածում, որ երազանքս իրականություն կդառնա», - պատմել է աղջիկը լրագրողներին:
Պուտինի նվերը նրան փոխանցել են Օմսկի մարզի սպորտի նախարարությունում, 12-ամյա ապագա գեղասահորդուհին խոստացել է, որ չմուշկներն իսկապես կծառայեն իրենց նպատակին: