Ֆանտաստիկա՝ մտածում են Աֆղանստանում խաղաղություն հաստատելու մասին
Վաշինգտոնը պատրաստ է լուծել բոլոր կողմերի «օրինական խնդիրները» Աֆղանստանում խաղաղությունը վերականգնելու համար: Այդ մասին հաղորդել է Աֆղանստանի հարցերով ԱՄՆ-ի հատուկ բանագնաց Զալմայ Հալիլզադը, հաղորդում է AP-ն:
Իր նշանակման պահից Հալիլզադը հանդիպել է բոլոր կողմերի հետ՝ ներառյալ թալիբներին, աֆղանական պաշտոնյաներին եւ Պակիստանի քաղաքական ու ռազմական ղեկավարությանը:
Ներկայումս թալիբները վերահսկում են Աֆղանստանի գրեթե կեսը եւ ավելի հզոր են, քան երբեւէ 2001 թվականին ԱՄՆ-ի ներխուժումից հետո:
«Ես տեսնում եմ, որ շատերն անհանգստացած են, որ Միացյալ Նահանգները պատրաստ է եւ′ խոսել, եւ′ պայքարել: Թույլ տվեք պարզաբանել. ԱՄՆ-ն խաղաղություն է ցանկանում»,-ամերիկյան դիվանագետը գրել է Twitter-ում:
Ըստ նրա՝ անհրաժեշտ է անհապաղ դադարեցնել ռազմական գործողություններն Աֆղանստանում, սակայն «խաղաղություն հաստատելը նաեւ նշանակում է, որ մենք կշարունակենք պայքարն ըստ անհրաժեշտության»:
Հալիլզադը ներկայումս այցով գտնվում է Իսլամաբադում, որտեղ հանդիպել է Պակիստանի վարչապետ Իմրան Հանի եւ զինված ուժերի գլխավոր հրամանատար, գեներալ Քամար Ջավեդ Բաջվայի հետ Աֆղանստանում խաղաղության վերականգնումը քննարկելու համար:
Անցյալ ամիս Հալիլզադը հանդիպել է թալիբների հետ Արաբական Միացյալ Էմիրություններում, որին մասնակցել են նաեւ Սաուդյան Արաբիայի, Պակիստանի եւ Էմիրատների պաշտոնյաները:
Պակիստանյան ԶԼՄ-ների հաղորդագրությունները վկայում են, որ Պակիստանը ջանքեր կգործադրի խաղախ գործընթացի կատիվացման համար՝ հրավիրելով թալիբներին Պակիստան:
Պակիստանի առաջնորդները նշում են, որ սատարում են խաղաղ գործընթացը, որը ձախողվել է թալիբների՝ Քաբուլում աֆղանական կառավարության հետ երկխոսել չցանկանալու պատճառով: Սակայն Վաշինգտոնը հույս ունի, որ Պակիստանը կօգնի վերջ դնել հակամարտությանը:
Հալիլզադը արագացրել է խաղաղ ջանքերը վերջին շաբաթներին այն հաղորդագրությունների ֆոնին, որ ԱՄՆ-ը ծրագրում է ամռանը դուրս բերել իր զորքերը:
Լուրեր Հայաստանից - NEWS.am