Եթե Մուկուչյանն է ասում, ապա նրան պետք է հավատալ. Ընտրությունները ընթանում են բնականոն

Ազգային ժողովի արտահերթ ընտրությունների քվեարկության մասնակցության վերաբերյալ տեղեկությունները Կենտրոնական ընտրական հանձնաժողովը կհրապարակի երեք ժամը մեկ, իսկ կեսգիշերից կսկսի քվեարկության արդյունքների աղյուսակավորումը: Այս մասին մամուլի ասուլիսի ժամանակ հայտարարեց ԿԸՀ նախագահ Տիգրան Մուկուչյանը։

«ՀՀ ԱԺ արտահերթ ընտրությունների ընտրողների ցուցակում ընդգրկված է 2 592 486 ընտրող։ Թվով 465 քաղաքացիներ էլեկտրոնային եղանակով քվեարկության միջոցով նոյեմբերի 31-ից մինչեւ դեկտեմբերի 2-ն ընկած ժամանակահատվածում արդեն իսկ կատարել են իրենց քաղաքացիական պարտքը», - տեղեկացրեց Տ. Մուկուչյանը՝ հավելելով, որ ընտրություններին մասնակցող կուսակցությունների եւ կուսակցությունների դաշինքներում ընդգրկված են ընդհանուր թվով 1444 թեկնածուներ։

Նա նշեց, որ 4 ազգային փոքրամասնություններից քաղաքական ուժերի առանձին ցուցակներում ընդգրկված են 12 թեկնածուներ:

Ընտրությունները կազմակերպելու նպատակով կազմակերպվել են 2010 ընտրատեղամասեր, որից 12-ը՝ ՔԿՀ-ներում:

Տիգրան Մուկուչյանի փոխանցմամբ, տեղամասային ընտրական հանձնաժողովների կազմերում ընդգրկված 20.099 քաղաքացիներից չեն ներկայացել 94-ը։

«Տեղամասային ընտրական հանձնաժողովները կազված են 10 անդամներից, որից 2-ին նշանակում է տարածքային ընտրական հանձնաժողովը, իսկ մյուս 8 անդամներից յուրաքանչյուր երկուսը ԱԺ-ում խմբակցություն ունեցող քաղաքական ուժերի կողմից: Ժամը 8-ի դրությամբ ընտրատեղամասերում գործարկվել են բոլոր 4000 տեխնիկական սարքավորումները:

Արտահերթ խորհրդարանական ընտրություններին դիտորդական առաքելություն կիրականացնեն թվով 8 միջազգային եւ օտարերկրյա կազմակերպությունների 505 միջազգային դիտորդներ եւ 17 813 տեղական դիտորդներ՝ 22 տեղական ՀԿ-ներից»,-ասաց Մուկուչյանը:

Նա նշեց, որ հավատարմագրվել է տեղական 70 զանգվածային լրատվամիջոց՝ 1200 ներկայացուցչով, 31 օտարերկրյա զանգվածային լրատվամիջոցից՝ ութսուն ներկայացուցիչ. «Այս պահին ընտրությունն ընթանում է բնականոն ընթացքով»:

Լուրեր Հայաստանից - NEWS.am