Անգելա Մերկելի կուսակցության նոր նախագահ է ընտրվել Անեգրետ Կրամպ-Կարենբաուերը
Համբուրգում դեկտեմբերի 7-ին կայացած Քրիստոնեադեմոկրատական միության համագումարում նոր նախագահ է ընտրվել Անեգրետ Կրամպ-Կարենբաուերը։ Նրա օգտին են քվեարկել համագումարի 999 պատվիրակներից 517-ը։ Նրա մրցակից Ֆրիդրիխ Մերցի համար տվել են 482 ձայն։ ՔԴՄ-ի նոր ղեկավարն ընտրվել է քվեարկության երկրորդ փուլի արդյունքներով՝ տեղեկացնում է DW-ը։
Անգելա Մերկելը, ով ղեկավարել է կուսակցությունը 18 տարի, այլեւս իր թեկնածությունը չի առաջադրել։ Միեւնույն ժամանակ, նա մտադիր է մինչեւ ժամկետի ավարտը եւ 2021թ․ խորհրդարանական ընտրությունները մնալ ԳԴՀ կանցլեր։
Ելույթ ունենալով իր կուսակիցների առջեւ՝ Աննեգրետ Կրամպ-Կարենբաուերը նշել է , որ Քրիստոնեադեմոկրատական միությունը տարբեր ճաշակների համար ապրանքներով կրպակ չէ։ Նրա խոսքերով՝ կուսակցությունը պետք է ամուր հենվի այն արժեքներից կազմված հիմքի վրա, որոնք արտահայտված են կուսակցության անվանման առաջին՝ «քրիստոնեական» բառի մեջ։
Կրամպ-Կարենբաուերը ՔԴՄ-ին կոչ է արել աջակցել եվրոպական անվտանգության խորհրդի եւ եվրոպական բանակի ստեղծման գաղափարին։ Նա նաեւ կոչ է արել առաջ քաշել այնպիսի գաղափարներ, որոնք կհիացնեն մարդկանց։