102-րդ ռազմաբազայի ռուս զինծառայողի ծեծի հետևանքո՞վ է Գյումրիում կինը մահացել

Որպես կասկածյալ կամ որպես մեղադրյալ ներգրավված անձինք չունենք, այսինքն՝ չունենք անձ, ով կասկածվում է տվյալ հանցագործությունը կատարելու համար. Tert.am-ի հետ զրույցում ասաց Շիրակի մարզի դատախազ Կարեն Գաբրիելյանը՝ անդրադառնալով մամուլի այն հրապարակումներին, որ Գյումրիի ռուսական ռազմակայանի ծառայողի կողմից սպանություն է կատարվել:

«Եղել է մարմնական վնասվածքներով կին, ով մահացել է, ի՞նչ կապ ունի ռուսական 102-րդ ռազմաբազան»,-ասաց նա:

Նշենք, որ դեկտեմբերի 2-ին դաժան ծեծի հետևանքով Գյումրիում մահացել է 1961 թվականին ծնված Ջուլիետա Ղազարյանը: Ըստ «Ա1+»-ի տեղեկությունների՝ Գյումրիի Վարդանանց հրապարակի տարածքում ռուս զինվորականը ծեծի է ենթարկել փողոց մաքրող կնոջը, որն էլ ստացած վնասվածքներից մահացել է: Կինը հիվանդանոց է տեղափոխվել արդեն մահացած:

Կարեն Գաբրիելյանը նշեց, որ կան վարկածներ, որի շուրջ կատարվում են անհրաժեշտ գործողություններ: Իսկ թե նման վարկած կա՞, որ ռուս զինծառայողի ծեծից է սպանվել կինը, ասաց, որ եթե ինքը որոշ վարկածներ սկսի հաստատել կամ հերքել, կստացվի, որ ինքը նախաքննական գաղտնիք է հրապարակում:

«Այս պահին վարկածները հրապարկման ենթակա չեն, կարող են լինել տասնյակից ավելի վարկածներ, չեմ կարող թվարկել»,-ասաց նա: Շիրակի մարզի դատախազը նշեց, որ իր հանձնարարականով երեկ՝ դեկտեմբերի 2-ին, դեպքի առթիվ քրեական գործ է հարուցվել՝ ՀՀ քրեական օրենսգրքի 112 հոդվածի 2-րդ մասի 14-րդ կետի հատկանիշներով (դիտավորությամբ առողջությանը ծանր վնասվածք պատճառելը, որն անզգուշությամբ առաջացրել է տուժողի մահը):