Ժողովուրդը քաղաքական առումով հաղթել է, բայց ժողովուրդը խնդիր ունի իրեն հաղթած զգալ նաև տնտեսական առումով
ՀՀ վարչապետի պաշտոնակատար Նիկոլ Փաշինյանն Արագածոտնի մարզի Աշտարակ քաղաքի հրապարակում ելույթ ունեցավ՝ նշելով, որ վարչապետները, կառավարությունները, Ազգային ժողովներն անցողիկ են, մնայունը քաղաքացինն է:
«Ժողովուրդը քաղաքական առումով հաղթել է, բայց ժողովուրդը խնդիր ունի իրեն հաղթած զգալ նաև տնտեսական առումով, և մենք ասում ենք, որ քաղաքական այս հեղափոխությանը պետք է հաջորդի տնտեսական հեղափոխությունը»,-ասաց նա: Նիկոլ Փաշինյանը հավելեց, որ հեղափոխությունը ոչ թե այն ժամանակ տեղի ունեցավ, որ ինքը կամ իր թիմը քայլ արեցին, այլ եղավ, երբ հավաքվածներից յուրաքանչյուրն իր քայլը արեց:
«Հեղափոխությունը մենք չենք արել, այլ դուք եք արել, սա ձեր հաղթանակն է, մենք ընդամենը ուրախ ենք, որ պատիվ ենք ունեցել ծառայել ձեր հաղթանակին: Ես միշտ իմ քաղաքական առաքելությունը համարել եմ ծառայելը և ասում եմ, որ մեծագույն առաքելությունը հող դառնալն է մեր ժողովրդի ոտքերի տակ, որ նրանք ամուր կանգնեն մեզ վրա, ուղղեն իրենց մեջքը և պարզ ճակատով, հպարտ քայլեն դեպի հզոր պետություն:
Ես եկել եմ ձեզ ասելու, որ այլևս չհավատաք նրանց, ովքեր փորձում են համոզել, որ մենք փոքր անօգնական խեղճ ժողովուրդ ենք»,-ասաց նա: Նիկոլ Փաշինյանը նշեց, որ մենք դեռևս փոքրաթիվ ժողովուրդ ենք, բայց մեծ ժողովուրդ ենք և լինելու ենք մեծ ժողովուրդ, քանի որ մեր հոգին հզոր ու անկոտրում է:
«Մենք կարողացել ենք այնպես անել, որ այսօր աշխարհի ցանկացած անկյունում Հայաստան ասելիս հասկանում են հզոր, հպարտ ժողովուրդ, որ առանց մի զոհի կարողացել է անել մի բան, որ ուրիշ երկրներ արել են տասնյակ հազար զոհերով, իրար մորթելով, կոտորելով:
Պետք չի, որ դուք հավատաք մեզ, մեր խնդիրն է, որ դուք հավատաք ձեզ, ձեր աշխատասիրությանը, ձեր հզորությանը, քանի որ դուք հզոր եք»,-ասաց նա և նշեց, որ ՀՀ քաղաքացու վիզը ծուռ չպետք է լինի:
«Մենք ասում ենք, որ ՀՀ-ն այլևս աղքատության երկիր չէ, հարստության երկիր է, մենք հնարավորություն ենք ստեղծելու, որ ՀՀ քաղաքացին հարստանա և հարստացնի»,-ասաց նա և նշեց, որ մենք փոքրաթիվ ենք, բայց մենք այլևս չենք քչանալու, մենք շատանալու ենք:
«Մենք այլևս չենք ասելու`մենք քիչ ենք, սակայն մեզ հայ են ասում, մենք ասելու ենք` մենք շատ ենք, և մեզ հայ են ասում, մենք հզոր ենք, և մեզ հայ են ասում, մենք հաղթող ենք և հայի, Հայաստանի անունը ամեն օրվա, ամեն շաբաթվա, ամսվա, տարվա հետ ավելի ու ավելի բարձր է հնչելու ողջ աշխարհում, որովհետև մենք Նարեկացու, Մարշալ Բաղրամյանի, Տիգրան Մեծի, Հովհաննես Թումանյանի ժողովուրդն ենք:
Մենք հոգնել ենք կորցնելուց, հայրենիք, երկիր կորցնելուց, իրար կորցնելուց, իրար սերը և հարգանքը կորցնելուց, մենք այլևս ձեռք ենք բերելու նոր նվաճումներ, և դրա համար հարկավոր է, որ դուք, ձեզանից յուրաքանչյուրը գիտակցեք ձեր ուժը, հզորությունը»,-ասաց նա: