Ներգաղթյալների 7.000 հոգանոց «քարավանին» ամերիկացի զինվորները փշալարերով կդիմավորեն (լուսանկարներ)
Միացյալ Նահանգների կառավարությունը նախապատրաստվում է Մեքսիկայից դեպի ԱՄՆ սահման շարժվող ներգաղթյալների բազմահազարանոց «քարավանի» ժամանմանը, գրում է Daily Mail-ը՝ մանրամասնելով, որ զինվորներին հրամայվել է սահմանը փշալարերով ծածկել:
Հայտնի է, որ «քարավանում» կա մոտ 7.000 մարդ, որոնք օրական 290 կմ ճանապարհ են հաղթահարում հնարավորինս շուտ սահման հասնելու համար: Նախկինում նրանք անհամեմատ ավելի քիչ տարածություն էին հաղթահարում, սակայն այժմ տեղաշարժվում են «ավտոստոպի» միջոցով:
Նշվում է, որ նրանց «դիմավորելու» նպատակով սահմանին փակվել են որոշ անցակետեր, որտեղ խստացվում են անվտանգության միջոցառումներն ու հավելյալ անվտանգություն է ապահովվում:
Հայտնի է նաև, որ այսօր սահման է մեկնելու ԱՄՆ ռազմական գերատեսչության ղեկավար Ջեյմս Մեթիսը:
Ավելի վաղ նախագահ Դոնալդ Թրամփը հայտարարել էր, որ անհրաժեշտության դեպքում պատրաստ է մինչև 15.000 զինծառայող ուղարկել սահման, որպեսզի ներգաղթյալների մուտքը կանխվի:
Ներկայում Միացյալ Նահանգների ուղղությամբ Հարավային Ամերիկայից ներգաղթյալների մի քանի «քարավան» է շարժվում: Նրանք հիմնականում Հոնդուրասի, Գվատեմալայի, Էլ Սալվադորի և Նիկարագուայի բնակիչներ են, որոնք փախչում են աղքատությունից, հանցավորության բարձր մակարդակից, քաղաքական անկայուն վիճակից ու հետապնդումներից:
Նրանց ճանապարհն անցնում է Մեքսիկայով, որի իշխանություններն ապաստան կամ ժամանակավոր աշխատանքային այցագրեր են տրամադրել 2.697 ներգաղթյալի:
