Դատական համակարգ չկա, նույն խաղերն են խաղում. Երվանդ Վարոսյան
Կառավարությունը վերջին շրջանում դատական համակարգի անկախության համար նախատեսում է որոշ արտոնություններ տրամադրել, մասնավորապես, արդարադատության նախարարությունը նախատեսում է դատավորներին ապահովագրել դժբախտ պատահարներից։
Նախագիծը սահմանում է՝ դատավորի պաշտոնավարման ընթացքում դժբախտ պատահարի հետևանքով հաշմանդամ ճանաչվելու դեպքում դատավորին վճարվում է ապահովագրական միանվագ գումար՝
1) առաջին խմբի հաշմանդամին՝ 1 մլն դրամ.
2) երկրորդ խմբի հաշմանդամին՝ 800 հազար դրամ.
3) երրորդ խմբի հաշմանդամին՝ 600 հազար դրամ:
Դատավորներին տրվող մյուս արտոնությունը ինքնապաշտպանության համար զենք ձեռք բերելն է: Արդյոք դատավորներին տրվող միանվագ գումարը սոցիալական բեռ չի՞ հանրության համար, եւ այսօրվա դատական համակարգն արժանի՞ է այս փոփոխություններին:
Araratnews.am-ի հետ զրույցում փաստաբան Երվանդ Վարոսյանն ասաց, որ ցանկացած պետություն, որն ուզում է ունենալ անկախ դատական համակարգ, պետք է պատրաստ լինի ահռելի գումարներ վճարելու, դատավորներին սոցիալապես ապահովելու՝ անկախ դատական համակարգ ունենալու համար: «Բայց դա նախադրյալներից մեկն է: Քանի դեռ մենք ունենք Բարձրագույն դատական խորհուրդ, որն իբր թե պետք է ձեւավորի դատական համակարգը, այս ամենն անիմաստ է: Դատական անկախ համակարգ ունենալու համար փնջով գործողություններ պետք է իրականացնել: Հակառակ դեպքում դա կլինի անարդյունավետ: Լավագույն դեպքում եվրոպացի դոնորներին կարելի է սա ցույց տալ որպես կարևոր նվաճում»,- ասաց փաստաբանը:
Երվանդ Վարոսյանի խոսքով՝ մեր դատավորների աշխատավարձը պետք է լինի ամենաբարձրը, քանի որ դատական համակարգը երկրի ողնաշարն է, բայց եթե իրեն հարցնեն՝ արժի՞ արդյոք այսօրվա դատավորներին տալ այդքան աշխատավարձ, ինքը կասի՝ ոչ: «Դատական համակարգի գլխին նույն խաղերն են խաղում, յուրայիններին բերում-նշանակում են, մի դատավորի բարձր են գնահատում, մյուսին՝ ցածր, ու ոչ ոք չգիտի՝ ինչու է այդպես: Դատական համակարգ այսօր չկա: Կան մարդիկ, որոնք նստում են դատարանների շենքում եւ հագնում սեւ պատմուճան»,- հավաստիացրեց փաստաբանը:
Ինչ վերաբերում է դատավորներին ինքնապաշտպանության համար զենք տրամադրելուն, Երվանդ Վարոսյանի համար այդ որոշումն անհասկանալի է: Արդյոք եղե՞լ է ինչ-որ սպառնալիք այս տարիներին կամ ոտնձգություն: Պետք է հասկանալ՝ ի՞նչն է այդ որոշման պատճառը:
ՀՀ աշխատանքի եւ սոցիալական հարցերի նախարարությունը նախատեսում է դատավորների կենսաթոշակն իջեցնել, որն առաջացրել է դատավորների, Բարձրագույն դատական խորհրդի դժգոհությունը: «Դատավորների սոցիալական պաշտպանվածությունը պետք է բարձր լինի, բայց դա պետք է լինի օրենքին ենթարկվող դատավորների, ոչ թե Բարձրագույն դատական խորհրդին, դրսից զանգող ինչ-որ պաշտոնյաներին ենթարկվողների ու սեւ պատմուճան հագնողների համար»,- ավարտեց իր խոսքը Երվանդ Վարոսյանը: