«Իրանական ռեժիմը դեռևս ընտրության հնարավորություն ունի». ԱՄՆ-ն հրապարակել է Իրանի նկատմամբ նոր պատժամիջոցների ամբողջական ցանկը
Միացյալ Նահանգների նախագահ Դոնալդ Թրամփի վարչակազմը հրապարակել է Իրանի նկատմամբ նոր պատժամիջոցների ամբողջական ցանկը, որոնց թիրախում է հայտնվել 50 բանկ, ազգային ավիափոխադրողը, նավաշինական ոլորտի 200 ներկայացուցիչ, ինչպես նաև՝ որոշ նավեր:
Ինչպես նշում է The Guardian-ը, թեև ամերիկյան կողմը նախքան այս հայտարարում էր, որ «Իրանի նկատմամբ երբևէ սահմանված ամենախիստ պատժամիջոցների արդյունքում իսլամական պետությունից նավթի արտահանման մակարդակը զրոյականի կհասցվի», այնուհանդերձ՝ նոր պատժամիջոցները չեն կարող նման արդյունք ապահովել:
Աղբյուրը հավելում է, որ պատժամիջոցների ցանկում է հայտնվել նաև երկրի ատոմային էներգիայի կազմակերպությունը: Սակայն այս հարցում Վաշինգտոնը երեք խոշոր բացառություն է արել Ռուսաստանի օգնությամբ կառուցված «Բուշեր» ատոմակայանի, Արաքի ծանր ջրի արտադրության ռեակտորի կայանի, ինչպես նաև Ֆորդուում ուրանի հարստացման ստորգետնյա նախկին գործարանի համար:
Պատժամիջոցների ցանկը ներկայացրել է ԱՄՆ պետքարտուղար Մայք Պոմպեոն՝ ևս մեկ անգամ ընդգծելով, որ դրանք երբևէ Իրանի նկատմամբ սահմանված խստագույն սահմանափակումներն ու արգելքներն են:
«Մեր նպատակն է այս պատժամիջոցների միջոցով այնպես անել, որ իրանական ռեժիմը հետ կանգնի իր որդեգրած հեղափոխական ճանապարհից: Իրանական ռեժիմը դեռևս ընտրության հնարավորություն ունի. այն կա՛մ կարող է 180 աստիճանով շրջադարձ կատարել ու իրեն պահել նորմալ երկրի պես, կա՛մ թույլ տալ, որ տնտեսությունը «ճաք տա»»,-ասել է պետքարտուղարը:
Պոմպեոն հավելել է, որ պատժամիջոցները չեն տարածվի Իրանին տրվող մարդասիրական օգնության վրա, սակայն փորձագետները հակադարձել են՝ նկատելով, որ Իրանի ֆինանսական համակարգի դեմ պատժամիջոցներն այն աստիճան խիստ են, որ բացասաբար կանդրադառնան Իրանի հետ ցանկացած տեսակի առևտրային կապի վրա:
Բացի այդ, Վաշինգտոնը պատժամիջոցներ է սահմանել բոլոր այն իրանցիների ու կազմակերպությունների նկատմամբ, որոնք 2015թ. Թեհրանի ու «միջնորդ վեցյակի» միջև կնքված պատմական միջուկային համաձայնագրից հետո ազատվել էին նախկինում Արևմուտքի սահմանած պատժամիջոցներից:
Նշվում է, որ պատժամիջոցները վերջ կտան այն բոլոր տնտեսական արտոնություններին, որոնք ԱՄՆ-ն Թեհրանին տվել էր միջուկային համաձայնագրի կնքումից հետո: Պատժամիջոցները մեծ վնաս կպատճառեն երկրի համար կենսական նշականություն ունեցող ու եկամտի հիմնական աղբյուր ծառայող նավթային արդյունաբերությանը:
Աղբյուրը նշում է, որ Եվրոպական Միությունը փորձում է այնպիսի ֆինանսական մեխանիզմեր մշակել, որոնք հնարավորություն կտան եվրոպական ընկերություններին շրջանցել ամերիկյան պատժամիջոցներն ու շարունակել Իրանի հետ բիզնես վարել: Այնուհանդերձ՝ եվրոպական խոշոր ընկերությունների մեծ մասը, չսպասելով պատժամիջոցների պաշտոնական սահմանմանը, արդեն հեռացել է Իրանից՝ վախենալով Իրանի հետ համագործակցության հետևանքով կորցնել ամերիկյան շուկան:
Պոմպեոն նախազգուշացրել է, որ ամերիկյան պատժամիջոցները կտարածվեն նաև այն արտասահմանյան ընկերությունների վրա, որոնք կփորձեն խաբել ԱՄՆ-ին ու գաղտնի բիզնես վարել իսլամական պետության հետ: