Փաշինյանը քաջ գիտակցում է, որ հակամարտությունն անլուծելի կմնա, ու գիտակցաբար բարձրացնում է պահանջների նշաձողը՝ իր դիրքերն ամրապնդելու համար
Ռուսական «Կոմերսանտ» պարբերականն անդրադարձել է Լեռնային Ղարաբաղի հակամարտության կարգավորման հարցին՝ նկատելով, որ թեպետ առաջընթաց չկա, այնուհանդերձ՝ այս օրերին տարածաշրջան այցելած ԵԱՀԿ Միսկի խմբի համանախագահները չեն հրաժարվում բանակցային գործընթացը «մեռած կետից» տեղաշարժելու փորձերից:
Անդրադարձի հեղինակները հիշեցնում են Միացյալ Նահանգների նախագահ Դոնալդ Թրամփի ազգային անվտանգության հարցերով խորհրդական Ջոն Բոլթոնի՝ Հայաստան կատարած այցի ժամանակ արած անսպասելի հայտարարությունը, համաձայն որի՝ ՀՀ վարչապետի ժամանակավոր պաշտոնակատար Նիկոլ Փաշինյանը Բաքվի հետ բանակցություններում ավելի վճռական քայլերի դիմելու «քարտ բլանշ» կարող է ստանալ: Ավելի վաղ նմանատիպ միտք էր հայտնել նաև ՀՀ-ում իր առաքելությունն ավարտող ԱՄՆ դեսպան Ռիչարդ Միլզը:
«Մինչդեռ պարոն Փաշինյանի մոտ Բոլթոնի առաջարկը ոգևորություն չի առաջացրել: «Ջոն Բոլթոնը խոսում է իր անունից, և առհասարակ որևէ մեկը չի կարող իմ անունից խոսել»,-ասել է Փաշինյանն ու ավելացրել, որ չի կարող կայացվել այնպիսի որոշում, որն անընդունելի կլինի Հայաստանի ու Արցախի ժողովուրդների, Արցախի իշխանությունների համար»,-նշվում է հոդվածում:
ՀՀ-ում Եվրամիության դեսպան Պյոտր Սվիտալսկին, արձագանքելով ամերիկացի պաշտոնյայի ասածին, հայտարարել էր, որ հակամարտության կարգավորման հարցում չի կարող արտաքին ճնշում գործադրվել:
Հեղինակների կարծիքով՝ Փաշինյանը, ի տարբերություն իր նախորդների, ավելի արմատական դիրքորոշում ունի այս հարցում: Նրանք չափազանց կտրուկ են համարում վարչապետի՝ ՄԱԿ-ի Գլխավոր վեհաժողովի ամբիոնից հնչեցրած այն միտքը, որ «եթե Ադրբեջանը չի ցանկանում բանակցել Ստեփանակերտի հետ, ուրեմն նշականում է, որ ցանկանում է սոսկ ԼՂ տարածքը ստանալ՝ առանց ժողովրդի»:
«Եթե չեք ցանկանում, որ հայ ժողովրդի նոր ցեղասպանություն տեղի ունենա, ապա Ղարաբաղը չպետք է Ադրբեջանի մաս կազմի»,-հայտարարել էր Փաշինյանը:
Ռուսական պարբերականի հետ զրույցում ՀՀ արտաքին քաղաքական գերատեսչության մամուլի խոսնակ Աննա Նաղդալյանը նշել է, որ կառավարության ծրագրում հստակ ամրագրված է, որ Արցախը՝ որպես հակամարտության հիմնական կողմ, պետք է որոշակի ձայն ու ներգրավվածություն ունենա կարգավորման գործընթացում:
«Հայկական կողմի գործողություններն ուղղված են տվյալ տրամաբանության շրջանակում խաղաղ բանակցային գործընթացի շարունակմանը»,-ասել է Նաղդալյանը:
Հայտնի է, որ բանակցային գործընթացում Ստեփանակերտի ներգավվածության հարցն օրակարգից հանվել էր գործընթացի դեռևս սկզբնական փուլում, քանի որ ԼՂՀ ներկայացուցիչների կարգավիճակը հնարավոր չէր որոշել:
Վերադառնալով ՄԽ համանախագահների տարածաշրջանային այցին՝ հեղինակները գրում են, որ Լեռնային Ղարաբաղում կայացած հանդիպման ժամանակ նախագահ Բակո Սահակյանը կրկնել է Փաշինյանի պնդումն առ այն, որ ԼՂ ներկայացուցիչները պետք է մասնակցեն բանակցային գործընթացին: Այնուհանդերձ՝ համանախագահները պաշտոնապես չեն արձագանքել Երևանի ու Ստեփանակերտի առաջարկին՝ դիվանագիտորեն խուսափելով ուղիղ պատասխանից:
«ԵԱՀԿ ՄԽ՝ Ղարաբաղի հարցով բանակցությունների ձևաչափի փոփոխման առաջարկը՝ Բաքվի համար անընդունելի լինելու պատճառով ընդունելու հնարավորություն չունեցող համանախագահների նոր այցը կրկին ցույց տվեց, որ այս միջազգային մեխանիզմը շարունակում է ապարդյուն աշխատել»,-պարբերականի հետ զրույցում ասել է «Քաղաքակրթությունների երկխոսություն» գիտական հետազոտությունների ինստիտուտի ղեկավար Ալեքսեյ Մալաշենկոն:
Նրա կարծիքով՝ Փաշինյանը քաջ գիտակցում է, որ հակամարտությունը շարունակում է անլուծելի մնալ, ու Երևանը երբեք Բաքվի հետ իրական երկխոսություն չի ունենա:
«Այնպես որ Փաշինյանը գիտակցաբար բարձրացնում է պահանջների նշաձողը, որ գոնե իր դիրքերն ամրապնդի հայրենիքում»,-եզրափակել է Մալաշենկոն: