Կարգին Հայկոն երեւանցիներից գոհունակության արտահայտություններ է սպասում
Քաղաքապետ Հայկ Մարությանն այցելել է Դավթաշեն վարչական շրջան եւ աշխատակազմին ներկայացրել վարչական շրջանի նորանշանակ ղեկավար Միքայել Թումասյանին: Խոսելով առաջիկա անելիքների մասին՝ Երեւանի քաղաքապետն ընդգծել է, որ թիմը պարտավոր է գործել այնպես, որպեսզի բնակիչները ոչ միայն չդժգոհեն, այլեւ իրենց գոհունակությունը հայտնեն կատարված աշխատանքի համար: Անդրադառնալով ապօրինի շինարարությանը` քաղաքապետ Հայկ Մարությանը մեկ անգամ եւս ընդգծել է, որ այդ ոլորտում ցանկալի արդյունքի հասնելու համար մեծ աշխատանք պետք է տարվի:
«Այսուհետ մենք ընդհանրապես թույլ չենք տալու որեւէ ապօրինի շինարարություն: Սա չի նշանակում, որ քաղաքը չի զարգանալու, սա չի նշանակում, որ քաղաքն առաջ չի գնալու: Ծավալվելու է նոր շինարարություն, բայց այն անխտիր պետք է համապատասխանի կոնկրետ նորմերին եւ լինի օրինական»,- նշել է Հայկ Մարությանը:
Երեւանի քաղաքապետը շնորհակալություն է հայտնել վարչական շրջանի նախկին ղեկավար Ռուսլան Բաղդասարյանին եւ աշխատակիցներին՝ վարչական շրջանում կատարած աշխատանքի համար, եւ համոզմունք հայտնել, որ աշխատակազմի աջակցությամբ առաջիկա տարիներին եւս հետզհետե լուծումներ կտրվեն բնակիչների կողմից վեր հանված խնդիրներին:
«Մենք բոլորս ծառայում ենք այն նպատակներին, որոնք դրված են մեր առջեւ ծառացած խնդիրները լուծելու համար: Կանցնի հինգ տարի, կգա ուրիշ թիմ, մենք նույնպես ղեկավարումը կհանձնենք իրենց, իսկ սա նշանակում է, որ ամեն մեկս մեր ընկած ժամանակահատվածում պետք է առավելագույնը անենք, որպեսզի քաղաքը զարգանա, որպեսզի քաղաքը գնա առաջ, սա է մեր նպատակը»,- նշել է Հայկ Մարությանն ու շնորհավորելով Միքայել Թումասյանին՝ Դավթաշեն վարչական շրջանի ղեկավարի պաշտոնում նշանակվելու առթիվ, մաղթել է հաջողություններ աշխատանքում:
Լուրեր Հայաստանից - NEWS.am