ՀՀԿ-ն՝ պատգամավորի սկանդալային բացահայտման մասին. Մենք «խաչբառեր» չենք լուծում
Դա քննության գաղտնիքն է, որեւէ մեկն իրավունք չունի նման հայտարարությամբ հանդես գալու: Այս մասին հոկտեմբերի 26-ին ԱԺ-ում ավանդական ճեպազրույցների ժամանակ ասաց ՀՀԿ խմբակցության ղեկավար Վահրամ Բաղդասարյանը՝ մեկնաբանելով Նիկոլ Փաշինյանի հայտարարությունը կոռուպցիայի գործի շրջանակում խորհրդարանի պատգամավորներից մեկի սպասվող կալանավորման մասին:
Նրա խոսքով՝ եթե վարչապետի պաշտոնակատարը նման կարգի հայտարարություն է անում, ապա պետք է բոլոր անունները բարձրաձայնի: «Կարծում եմ, որ դա քննության գաղտնիքն է, եւ որեւէ մեկն իրավունք չունի նախաքննության փուլում նման հայտարարությամբ հանդես գալու: Ես չեմ կարող եզրակացություններ կատարել եւ անուններ տալ»,- պարզաբանեց Բաղդասարյանը:
Ընդ որում՝ նա նշեց, որ վարչապետի պաշտոնակատարից է առաջին անգամ լսում նման դեպքի մասին: Հստակեցնող հարցին՝ հնարավո՞ր է, որ այդ պատգամավորը Հայաստանի Հանրապետական կուսակցությունից է, եւ արդյոք գիտի՞, թե ում մասին է խոսքը, ՀՀԿ խմբակցության ղեկավարը պատասխանեց, թե իրենք «խաչբառեր» չեն լուծում:
Լուրեր Հայաստանից - NEWS.am