Մեղրին ի՞նչ կապ ունի Ֆրանկաֆոնիայի գագաթնաժողովի հետ
Առաջիկա հինգշաբթի եւ ուրբաթ օրերը Հայաստանում ոչ աշխատանքային են: ԱԺ արտահերթ նիստում երկրորդ ընթերցմամբ եւ ամբողջությամբ ընդունվեց «ՀՀ տոների և հիշատակի օրերի մասին» Հայաստանի Հանրապետության օրենքում լրացում կատարելու մասին օրենքի նախագիծը՝ 62 կողմ, 1 ձեռնպահ ձայներով:
Նախագծի համաձայն՝ հոկտեմբերի 11-ն ու 12-ը կհամարվեն ոչ աշխատանքային օրեր:
Օրենքում փոփոխություն կատարելու անհրաժեշտությունն առաջացել է՝ պայմանավորված հոկտեմբերի 11-12-ին Երեւանում անցկացվելիք Ֆրանկոֆոնիայի 17-րդ գագաթնաժողովով:
Գագաթնաժողովն անցկացվելու է Երեւանում, բայց, անհասկանալի պատճառներով ոչ աշխատանքային օրեր են լինելու նաեւ Մեղրիում, Աշոցքում, Իջեւանում եւ Եղեգնաձորում:
Դժվար է ասել, թե ով է այս տարօրինակ որոշման հեղինակը, բայց առավել տարօրինակն այն է, որ խորհրդարանում եւ հատկապես կառավարությունում չգտնվեց մի մարդ, որը սթափության կոչ անի:
Չորս օր Հայաստանը մատնել անգործության՝ առնվազն անհասկանալի է: Ընդամենը պետք էր փակել Երեւանի կենտրոնը երթեւեկության համար, ընդամենը պետք է փակեին այդ հատվածում գտնվող հիմնարկ-ձեռնարկությունները, դպրոցները եւ այլ ուսումնական հաստատությունները եւ բավարարվել դրանով:
Իսկապես, տարօրինակ ժամանակներ են, երբ կայացվում են անհասկանալի եւ տարօրինակ որոշումներ:
Վարդան Մխիթարյան
Top-News.am