ԱԺ արտահերթ ընտրությունները տեղի կունենան ամենաուշը հաջորդ տարվա հունիսի առաջին տասնօրյակում
Ամենաուշը հաջորդ տարվա մայիսին կամ հունիսի առաջին տասնօրյակում ՀՀ-ում պետք է տեղի ունենան արտահերթ խորհրդարանական ընտրություններ: Այս մասին այսօր՝ սեպտեմբերի 2-ին ֆեյսբուքյան ուղիղ եթերում ասաց ՀՀ վարչապետ Նիկոլ Փաշինյանը:
«Իհարկե՝ ասված է մեկ տարվա ընթացքում, եւ դա մեծապես կախված է քաղաքական իրավիճակից, իսկ այդ քաղաքական իրավիճակում հիմնական թելադրող քաղաքական ուժը լինելու է ՀՀ քաղաքացին, Հայաստանի ժողովուրդը եւ այնպես, որ այսօր, ըստ էության, խորհրդարանը լուծարելու մեխանիզմ գոյություն չունի, եւ եթե հանրությունը հստակ պնդի այդ դիրքորոշումը, այո՛, կարծում եմ, որ մենք պետք է ունենանք խորհրդարանի լուծարման հստակ մեխանիզմներ: Այստեղ կա մի քանի տարբերակ, որոնցից որեւէ մեկը հընթացս կընտրվի»,- ասաց նա:
Փաշինյանը հիշեցրել է. գործող Սահմանադրությամբ մեխանիզմն այն է, որ վարչապետը պետք է հրաժարական տա, դրանից հետո խորհրդարանը երկու շաբաթվա ընթացքում երկու անգամ չընտրի նոր վարչապետ, որից հետո Ազգային Ժողովը իրավունքի ուժով պետք է արձակվի:
«Եվ, ըստ էության, կառավարության ծրագրով, որն ընդունվել է խորհրդարանի կողմից, այս քաղաքական պայմանավորվածությունը հստակ արձանագրվել է խորհրդարանի, կառավարության եւ ժողովրդի կողմից: Բայց հետեւելով Հայաստանի քաղաքացիների տրամադրություններին՝ քաղաքացիներն ուզում են, որ լինեն որոշակի երաշխիքներ, որ իրենք վարչապետի ենթադրվող հրաժարականից հետո նորից ստիպված չեն լինելու հեղափոխություն անել, այսինքն՝ երկու հեղափոխություն մեկ տարվա ընթացքում: Բնականաբար, ես կարծում եմ, որ անհրաժեշտության դեպքում ՀՀ քաղաքացիները կանեն այդ հեղափոխությունը, բայց նաեւ մարդկանց այս ուղերձն ընկալելով՝ կարծում եմ, որ մենք պետք է ունենանք երաշխիքներ, որ հակաժողովրդական գործընթացներ ձեռնարկելու փորձեր չեն արվելու»,- ասաց վարչապետը:
Նիկոլ Փաշինյնանը նշեց, որ դրա համար կա երկու տարբերակ: «Առաջին տարբերակն այն է, որի մասին ես խոսել եմ: Պետք է իրականացվեն սահմանադրական փոփոխություններ, որտեղ խորհրդարանի արձակումը կարող է տեղի ունենալ նաեւ առանց վարչապետի հրաժարականի: Այսինքն՝ խորհրդարանն ինքն ընդունի ինքնալուծարման մասին որոշում, իհարկե, եթե, այսպես ասած, կայուն մեծամասնություն գոյություն չունի կամ այլ պայմաններում: Դա տարբերակներից մեկն է, եւ ամենաերաշխավորված տարբերակներից մեկն է: Կարող է լինել այլ տարբերակ, որ խորհրդարանական ուժերն ուղղակի այդ մասին ստորագրեն համաձայնագիր, բայց քանի որ մենք գիտենք, որ այդ համաձայնագրերը կարող են բավարար չթվալ մեր հանրությանը, որովհետեւ նրանք առնվազն տեսել են Հանրապետականի խոստման դրժման մի այնպիսի օրինակ, որն առնվազն բերեց հեղափոխության: Հիմա աշխատում ենք սահմանադրական փոփոխությունների վրա: Փաթեթը շուտով պատրաստ կլինի, եւ մենք այն կուղարկենք խորհրդարան: Այս համատեքստում կունենանք քաղաքական քննարկումներ, ինչպես նաեւ ժողովրդի հետ քննարկումների արդյունքում կգանք ընդհանուր որոշումների»,- ասաց վարչապետը: