Վանաձորում հացը թանկացել է
Վանաձորում վերջին օրերի հացի գինը բարձրացել է միանգամից 30 դրամով, ինչը դժգոհության ալիք է բաձրացրել բնակչության շրջանում: Վանաձորի հաց արտադրող խոշոր ընկերությունների ղեկավարներից մի քանիսը լրագրողների հետ զրույցում պատճառաբանել են, թե թանկացումը կապված է ինչպես ռուսական ալյուրի գնի բարձրացման, այնպես էլ հաց արտադրողների՝ միասնական որոշման հետ, ասել է թե՝ բոլորով եկել են համաձայնության ու մեկ միասնական գին որոշել:
Փռատերերից ոմանց խոսքով՝ նախկինում հացը էժան է եղել, քանի որ մի քանի հաց արտադրող ընկերություններ հացը վաճառել են ինքնարժեքից ցածր, ինչի պատճառով շա փռեր անգամ փակվել են. «Այսօր համաձայնության ենք եկել, որոշել ենք բոլորով միասնական գին սահմանել»,-NEWS.am-ի հետ զրույցում ասաց փռատերերից մեկը, չցանկանալով ներկայանալ:
Հացի գնի բարձրացմանը բնակիչների մի խումբ էլ քաղաքական ենթատեքստ է տալիս, ասելով, թե այս ամենը դիտավորյալ է հիմա արվում՝ նպատակ ունենալով բնակչությանը լարել հարկային մարմինների ու գործող իշխանության հետ: Տնտեսվարողները սակայն նշում են, թե գնի բարձրացումը անխուսափելի էր, ու իրենք նախկին գնով չէին կարող այլեւս գոյատեւել:
Հացի գնի բարձրացման հետ կապված օրերս քաղաքապետ Մամիկոն Ասլանյանի գլխավորությամբ քննարկում է տեղի ունեցել: Հաց արտադրողները նշել են, որ գնի բարձրացման պատճառը միայն ՌԴ-ում ալյուրի գների տատանումը չէ: Նրանց խոսքով, հացի գնի բարձրացման հիմնական պատճառն այն է, որ 2015թ.-ից ի վեր Վանաձորում ոչ առողջ մրցակցության հետեւանքով գներն արհեստականորեն իջեցվել են, եւ գրեթե բոլորն աշխատելիս են եղել վնասով: Արտադրողները բերել են նաեւ օրինակներ, որ հարակից շրջաններում հացն ավելի թանկ է եղել: Հաց արտադրողներն առաջարկել են հացի մատչելի տեսականու արտադրության ծավալի մեծացում, որը սոցիալապես անապահով խմբերի վրա չի անդրադառնա:
Մամիկոն Ալսանյանը նշել է, որ խնդրի հետ կապված առաջիկայում քննարկում կլինի նաեւ ավագանիում:
Խնդրին անդրադարձել է նաեւ ՀՀ փոխվարչապետ Տիգրան Ավինյանը, ով նախօրեին եղել է Լոռու մարզում: Ավինյանը, մասնավորապես, նշել է, որ խորհրդակցության արդյունքում պարզվել է, որ, իսկապես, նախկինում ոչ մրցակցային գներ են սահմանված եղել, որի արդյունքում շատ հացի փռեր փակվել են. «Հիմա այս ընկերությունները բացատրում են, որ հացի իրական գինը սա է փաստացի, եւ նախկինում իրենք դեմպինգի արդյունքում են ստիպված եղել այլ գին դնել: Մենք ունենք տեսչական մարմին, որը նման հարցերով զբաղվում է, եւ կարծում եմ՝ տեսչական մարմնի ղեկավարը անպայմանորեն կանդրադառնա այս խնդրին, որպեսզի հասկանանք՝ արդյո՞ք գինը պայմանավորված է խաղացողներով, թե՞ դա օբյեկտիվ գին է»,- ընդգծել է Ավինյանը:
Նա նաեւ ընդգծել է, որ բոլորը պետք է լինեն հարկային դաշտում եւ աշխատեն հավասար պայմաններում՝ հավելելով, որ համապատասխան մարմինները առաջիկայում ուսումնասիրություններ կանեն՝ հացի թանկացման պատճառներն ու հիմնավորումները պարզելու համար: