Հայաստանը կարող է մշտապես ակնկալել Վրաստանի աջակցությունը. Վրաստանի ԱԳ նախարարը՝ ՀՀ դեսպանին
Հայաստանը կարող է մշտապես ակնկալել Վրաստանի աջակցությունը: Այս մասին, այսօր՝ հունիսի 28-ին Վրաստանում ՀՀ դեսպան Ռուբեն Սադոյանի հետ հանդիպման ժամանակ նշել է Վրաստանի արտաքին գործերի նորանշանակ նախարար Դավիթ Զալկալիանին:
ԱԳՆ-ից հայտնում են, որ շնորհավորելով Վրաստանի արտգործնախարարին պաշտոնի ստանձնման առթիվ՝ ՀՀ դեսպանը հաջողություններ մաղթեց եւ հույս հայտնեց, որ նրա պաշտոնավարման ընթացքում հայ-վրացական բարեկամական հարաբերություններն առավել կխորանան։
Հանդիպմանը կողմերը քննարկեցին երկկողմ հարաբերությունների օրակարգային հարցերի լայն շրջանակ, անդրադարձան բարձր մակարդակի փոխայցելություններին, երկկողմ առեւտրատնտեսական հարաբերություններին, զբոսաշրջությանը եւ այլն։
Իր խոսքում դեսպան Սադոյանն անդրադարձավ ՀՀ-ԵՄ համապարփակ եւ ընդլայնված գործընկերության համաձայնագրին եւ այն հնարավորություններին, որոնք ընձեռում է այդ համաձայնագիրը։
Նախարար Զալկալիանին նշեց, որ հաշվի առնելով այդ ուղղությամբ վրացական կողմի կուտակած փորձը, բարեկամ Հայաստանը կարող է մշտապես ակնկալել Վրաստանի աջակցությունը։
Դեսպան Սադոյանն նախարար Զալկալիանիին ներկայացրեց այս տարի Երեւանում կայանալիք Ֆրանկոֆոնիայի միջազգային կազմակերպության գագաթաժողովի վերաբերյալ մանրամասներ, ինչին ի պատասխան` նախարար Զալկալիանին նշեց, որ Վրաստանն այդ խոշորամասշտաբ միջոցառմանը ներկայացված կլինի բարձր մակարդակով։
Զրուցակիցները մտքեր փոխանակեցին հայ-վրացական տնտեսական համագործակցության միջկառավարական հանձնաժողովի աշխատանքների վերաբերյալ՝ խոսելով այն քայլերի մասին, որոնք հնարավորություն կտան մոտ ապագայում կազմակերպել հանձնաժողովի նիստը։
Դեսպան Սադոյանն ընդգծեց ՀՀ քաղաքացի հանդիսացող սիրիահայերի՝ Վրաստան մուտքի հետ կապված խնդիրների շուտափույթ լուծման կարեւորությունը՝ այդ առումով նշելով, որ սիրիահայերը, ՀՀ լիարժեք քաղաքացիներ հանդիսանալով, չպետք է եղբայրական Վրաստանի տարածք մուտք գործելու խնդիրներ ունենան։
Դավիթ Զալկալիանին գոհունակությամբ փաստեց վերջին տարիներին Վրաստանում հայաստանցի զբոսաշրջիկների եւ այցելուների թվի աճը։