Հայաստանում այժմ կոռուպցիա չկա. Նիկոլ Փաշինյան
Ես կարող եմ ասել, որ այժմ Հայաստանում կոռուպցիա չկա: Այս մասին RT գործակալությանն ասել է Հայաստանի վարչապետ Նիկոլ Փաշինյանը՝ պատաասխանելով երկրում հակակոռուպցիոն քաղաքականության հաջողությունների մասին հարցին:
«Իհարկե, կարող են լինել որոշ առանձին երեւույթներ՝ կոռուպցիոն անցյալի կոռուպցիոն մնացորդներ: Իհարկե, սա ապագայի երաշխիք չէ, բայց ես կարծում եմ, որ այս մթնոլորտը, այս գործընթացը թույլ կտան մեզ երաշխավորել այս իրավիճակի շարունակությունը», - ասել է նա:
Պատասխանելով հարցին այն մասին, որ ԱՊՀ երկրներում հաճախ են ծագել իրավիճակներ, երբ հին վերնախավը նորից իշխանության է անցել, Նիկոլ Փաշինյանը նշել է, որ դրա երաշխիքը ժողովրդի կամքն է:
«Ինչ-որ բան փոխվել է մարդկանց ներսում, մտածողությունում: Դա շատ կարեւոր գործոն է, որը թույլ է տվել առանց մեծ բախումների, առանց արյան հեղափոխություն իրականացնել: Պայքարը տեղի է ունեցել յուրաքանչյուր քաղաքացու ներսում: Ես կարծում եմ, որ մեր հեղափոխության գլխավոր արդյունքը իշխանության փոփոխությունը չէ, այլ մտածողության փոփոխությունը: Եվ դա կախված չէ կառավարությունից», - ասել է նա:
Նիկոլ Փաշինյանը մեկնաբանել է Facebook-ում իր կողմից հունիսի 1-ին արված տեսանյութն այն մասին, որ ապրանքների գների աճի նախաձեռնողները «իրենց վրա կզգան օրինականության ողջ ուժը»:
«Մեզ մոտ այնպիսի իրավիճակ էր, որ մենք Երեւանի բազմաթիվ սուպերմարկետներում անօրինական գործունեություն էինք ֆիքսել եւ երբ մենք այդ գրանցեցինք, նրանք որոշ ապրանքների գները համաձայնեցված բարձրացրեցին. դա սաբոտաժի նման էր: Դա մեր գործողությունների արձագանքն էր, որն ուղղված էր օրինականության վերականգնմանը: Ինչ վերաբերում է ՝ ինչպես ասացիք «ամբողջ ուժը՞»: Շատ սուպերմարկետներ արդյունքում բարձր տուգանքներ վճարեցին, որովհետեւ նրանց գործողություններն անօրինական էին», - ասել է նա: