Ասում էր` կսպանեմ, կխփեմ, կգյուլեմ, ոնց որ կռիվ կինո լիներ. Մանրամասներ Սեւանում հնչած կրակոցների դեպքից
Սեւանի դատարանի մոտ հնչած կրակոցներից հրազենային վիրավորվում ստացած, Գեղարքունիքի փոխմարզպետ Անդրանիկ Հակոբյանի հորեղբոր որդին՝ Ռաֆիկ Հակոբյանը վիրահատվել է, նրա վիճակը կայուն ծանր է, գտնվում է վերակենդանացման բաժնում: Այս մասին NEWS.am-ին հայտնեց փաստաբան Հովսեփ Սարգսյանը:
Նշենք, որ դեպքը տեղի է ունեցել փոխմարզպետ Անդրանիկ Հակոբյանի որդու՝ 29-ամյա Հայկ Հակոբյանի աղմկոտ սպանության գործով նիստից առաջ` Սեւանի դատարանում:
Փաստաբանը դեպքի մանրամասները պատմեց, ըստ որի դեպքը շատ անսպասելի էր տեղի ունեցել:
«Դատարանի բակում հավաքված, կանգնած սպասում էինք, որ գնանք դատական նիստի: Այդ պահին ինչ-որ մեքենաներ մոտեցան, մարդիկ իջան: Մեկը ավտոմատով սկսեց սպառնալիքներտալ, ասում էր` կսպանեմ, կխփեմ, կգյուլեմ ու սեռական բնույթի հայհոյանքեր էր տալիս: Այդ սպառնալիքներն ուղղված էին Անդրանիկ Հակոբյանն էր: Ամբաստանյալի՝ Մեխակ Հարությունյանի քեռին էր եւ պապիկը, բոլորը գոռում էին Գագո, մի արա, Գագո, մի արա: Քեռին նստեց մեքենան, շրջադարձ կատարեց ու հետո հանեց երկարափող հրացանը եւ կրակեց Անդրանիկ Հակոբյանի ուղղությամբ: Այդ ամենը տեւել է մի 10 րոպե, ես կարողացա Անդրանիկ Հակոբյանին տանել դատարանի կողմը, նա էլ իր բարեկամներին գոռաց հետ քաշվեք, ով հասցրեց, սյուների հետեւում թաքնվեց, ով էլ չէ` դատարանի շենք մտավ: Ակնհայտորեն կրակողի` Գագիկ Հակոբյանի գործողություններն ուղղված չէին ոստիկաններին, այլ ուղղված էին Անդրանիկ Հակոբյանին: Մի խոսքով` կարծես կռիվ կինո լիներ էդ դեպքը»,- պատմեց փաստաբանը:
Փաստաբան Հովսեփ Սարգսյանը հավելեց, որ այս դեպքը կապում են քրեական հեղինակություն Նորատուսցի Ալիկի` Ալիկ Բանդուրյանի հետ, սակայն ինքը բոլորին հորդորում է դիմել Քննչական կոմիտե, պարզելու թե ինչ կապ ունի Նորատուսցի Ալիկը` դեպքի հետ:
Նշենք, որ Նորատուսցի Ալիկը սպանված Հայկ Հակոբյանի հեռավոր ազգականն է:
Ավելի վաղ հայտնել էինք, որդատարանի բակում կրակող տղամարդը ներկայացրել է ոստիկանություն եւ հանձնել զենքը:
Հիշեցնենք, որ Մեխակ Արտակի Հարությունյանին մեղադրանք է առաջադրվել այն բանի համար, որ նա ապօրինի կերպով ձեռք է բերել,պահել եւ կրել է ռազմամթերք հանդիսացող 48 ատրճանակային փամփուշտներ եւ գործարանային արտադրության մարտական ակոսափող հրազեն հանդիսացող 9մմ տրամաչափի ԻԲ 6528 համարի Մակարով տեսակի ատրճանակ, որից արձակված 7 կրակոցներով 2017թ. հունվարի 07-ին,ժամը 12.20-ի սահմաններում սպանել է համագյուղացի, ՀՀ Գեղարքունիքի մարզի Նորատուս գյուղի բնակիչ Հայկ Անդրանիկի Հակոբյանին: Հավելենք, որ այսգործով նիստերը պարբերաբար լարված մթնոլորտում են անցել. եւ դատարանը որոշել էր նիստերը դռնփակ անցկացնել:
Լուրեր Հայաստանից - NEWS.am