Գյուղվարկերի տույժերի համաներման արդյունքում կմաքրվեն նաև վարկառուների «սև պատմությունները». գյուղատնտեսության նախարար
Չի կարող ոլորտն ազատվել հարկերից, անգամ եթե դա բերում է թանկացումների: Այլապես պետք է հրաժարվել բանակ, ոստիկանություն ու ուսուցիչ պահելուց:
Tert.am-ի հետ զրույցում այս մասին հայտարարեց գյուղատնտեսության նորանշանակ նախարար, ՀՅԴ ներկայացուցիչ Արթուր Խաչատրյանը:
Հիշեցնենք, որ որոշ տնտեսագետներ դեմ են արտահայտվել վարչապետ Նիկոլ Փաշինյանի՝ «թալանչիների և կոռուպցիոներների» սուպերմարկետները բոյկոտելու կոչին, քանի որ այս պահին դաշտերում ու ջերմոցներում այդքան գյուղմթերք չկա, իսկ դրսից ներկրողները հենց այդ սուպերմարկետների տերերն են, մյուս կողմից՝ ապրանքների դեֆիցիտը բերելու է նոր գնաճի:
Ավելին, ըստ այդ կարծիքն ունեցողների՝ Կառավարությունը պետք է հաշվարկի անհրաժեշտ հումքի քանակությունը: Նշենք, որ վարչապետ Փաշինյանի այս կոչին միացել է նաև տնտեսական զարգացման և ներդրումների նախարար Արծվիկ Մինասյանը:
Հիշեցնենք, որ Հայաստանը մսամթերքի, թռչնամթերքի և սեզոնային որոշ ապրանքատեսակների մի մասը ներկրում է:
«Սառեցված մսամթերք, իհարկե, ներկրում են, և թռչնի միս, վերջինի դեպքում՝ մոտ երկու երրորդը»:
Հարցին, թե ակնհայտ է, որ այս պարագայում պետք է սպասել գնաճի նոր ալիքի, նախարարն ասաց. «Դու չես կարող բոլոր հարկերից հրաժարվել՝ խուսափելու համար գների աճից: Եթե տեքստիլ արդյունաբերությունը ԱԱՀ-ից ազատես, վերնաշապիկի գինն էլ կիջնի, սակայն հարկերից ազատվելու դեպքում պետք է հրաժարվես բանակ պահելուց, ոստիկանություն ունենալուց, բժիշկ, ուսուցիչ պահելուց, ճանապարհ կառուցելուց: Հարկերն անխուսափելի են, և արդար հարկային քաղաքականությունը բոլորի նկատմամբ պետք է կիրառելի լինի»:
Հարցադրմանն էլ, թե կա գնաճի՝ «ա», «բ» տարբերակ-հակազդեցության սցենար, նախարարը պատասխանեց՝ հիշեցնելով, որ մանրածախ առևտուրը այլ մարմինների խնդիր է:
Հիշեցնենք, որ ԱԱԾ-ի՝ «Երևան Սիթի» -ում կատարած բացահայտումների արդյունքում պարզվեց, որ գյուղմթերքի համար տնտեսավարողը մուծել է 20 տոկոսի փոխարեն 5 տոկոսի հարկեր, իսկ ձերբակալություններից հետո գյուղմթերքն էականորեն թանկացավ: Մսի կիլոգրամը, հիշեցնենք, թանկացել էր մոտ 500 դրամով:
Գյուղնախարարը նշեց նաև, որ անցած շաբաթ փոխվարչապետի, ֆինանսների նախարարության ներկայացուցիչների մասնակցությամբ քննարկվել է Կենտրոնական բանկում գյուղատնտեսական վարկերի տույժ-տուգանքների համաներման հարցը, և կա ընդհանուր համաձայնություն, որ հարկային օրենսդրության մեջ տեղի ունենալիք փոփոխության արդյունքում բանկերն առանց վնասի ներեն արտաբալանսավորված վարկերի չսպասարկումից առաջացած տույժ-տուգանքները: Սրանով կմաքրվի նաև բանկային ռեգիստրն ու «ACRA» համակարգը: Բանկային ռեգիստրի մաքրումը նշանակում է մաքրել վարկառուների «սև պատմությունները»: