Խնդրում եմ 2-3 ամիս ժամանակ տրամադրել Նիկոլ Փաշինյանին եւ նոր կառավարությանը. Շանթ Հարությունյանի կոչը
Երկրի ներքին անկայունությունից ցանկանալու է օգտվել ոչ միայն ՀՀ արտաքին թշնամին, այլեւ Հայաստանի ոխերիմ դաշնակիցը։ Այդ մասին հայտնել է «Ցեղակրոն» շարժման առաջնորդ, քաղբանտարկյալ Շանթ Հարությունյանը, որը բանտից կոչով դիմել է Հայաստանի հանրությանը։
«Չնայած նրան, որ ես եւ Նիկոլ Փաշինյանն ունենք գաղափարական եւ մոտեցումային տարբերություններ կապված Հայաստանի արտաքին ուղղվածության հետ, այնուամենայնիվ, հարկ եմ համարում՝ չհավակնելով դիմել ողջ ժողովրդին, դիմել իմ բոլոր համախոհներին եւ բոլորին, ովքեր կցանկանան լսել իմ խոսքը։ Հարգելի՛ քաղաքացիներ, դիմում եմ ձե՛զ, բոլորի՛դ, ձեզանից յուրաքանչյուրի՛ն։ Դադարեցնե՛լ անհնազանդության բոլոր այն միջոցառումները, որոնք սպառնում են երկրի ներքին կայունությանը։
Բոլորիս համար ակնհայտ է, որ մեր երկրում կուտակված են բազմաթիվ չլուծված խնդիրներ , որի հետեւանքով էլ տեղի ունեցավ եւ հաղթանակեց համաժողովրդական շարժումը։
Խնդրում եմ 2-3 ամիս ժամանակ տրամադրել Նիկոլ Փաշինյանին եւ նոր կառավարությանը, որպեսզի նրանք հնարավորություն ունենան կուտակված խնդիրների լուծման քայլերը տեսանելի դարձնել ժողովրդին։
Կուզեի նաեւ զգուշացնել երկրի ճակատագրով մտահոգ քաղաքացիներին։ Երկրի ներքին անկայունությունից ցանկանալու է օգտվել ոչ միայն ՀՀ արտաքին թշնամին, այլեւ Հայաստանի ոխերիմ դաշնակիցը։
Պարզաբանեմ միտքս․
Երբ, որեւէ հետխորհրդային երկրում տեղի է ունենում այսպես կոչված «հակառուսական» հեղափոխություն, Ռուսական կայսրությունը տվյալ երկրին եւ ժողովրդին հայտարարում է իր թշնամին եւ պայքար սկսում դրա դեմ։ Իսկ եթե հեղափոխությունը չի կրում այսես կոչված «հակառուսական» բնույթ (ինչպես մեր հայկական թավշյա հեղափոխությունը), սակայն վայելում է համաժողովրդական մեծ վստահություն եւ սեր,այնուամենայնիվ, նույն Ռուսաստանը միեւնույն է այդ ուժերին չհամարելով թշնամի, չի էլ ցանկանում համարել բարեկամ եւ դաշնակից՝ ձգտելով այդ առաջնորդներին դարձնել խամաճիկ։Որեւէ առաջնորդի իր կամակատարը դարձելու համար դիմում է ամենանենգ դավերի՝ սեպ խրելով համաժողովրդական սեր վայելող առաջնորդի եւ ժողովրդի միջեւ․ այդպիսով առաջնորդին զրկելով համաժողովրդական հենարանից։
Որքան էլ Նիկոլ Փաշինյանը հայտարարում է, որ զարգանալու են հայ-ռուսական հարաբերությունները, միեւնույն է, Կրեմլը փորձելու է հարկադրական երկընտրնաքի առջեւ կանգնեցնել Նիկոլ Փաշինյանին՝ ստիպելով նրան կա՛մ ոստիկանական միջոցներով պաշտպանել ներքին կայունությունը, կորցնելով հեղինակությունը սեփական ժողովրդի մոտ, կա՛մ դիմել հրաժարականի։ Երկու տարբերակն էլ ձեռնտու է Կրեմլին։ Այս տարբերակներից ոչ մեկը ոչ միայն ձեռնտու չէ Հայաստանին, այլեւ դա կլինի ամենարագ ճանապարհը Հայստանի կործանման։
Հայ ժողովրդը պետք է կարողանա պաշտպանել սեփական նվաճումները։ Սա է գլխավորը այսօր»,- նշել է Շանթ Հարությունյանը։