Սաուդյան Արաբիայի ազգային նավթային ընկերության տնօրենների խորհրդում առաջին անգամ կին է ընդգրկվել

Սաուդյան Արաբիայի ազգային նավթային ընկերություն Аравии Saudi Aramco-ի տնօրենների խորհրդում առաջին անգամ կին է ընդգրկվել, հայտնում է Reuters-ը:

Խորհրդում տեղ է գրավել ամերիկյան խոշոր նավթային եւ նավթաքիմիական ընկերություն Sunoco-ի նախկին գլխավոր տնօրեն եւ նախագահ Լինն Էլսենհանսը:

Ինչպես նշում է Forbes-ը, Էլսենհանսը խոշոր նավթային ընկերության առաջին կին ղեկավարն է: Նա 2011 թվականին մոլորակի ամենաազդեցիկ կանանց վարկանիշում զբաղեցրել է 46-րդ հորիզոնականը:

2010 թվականին Էլսենհանսը Financial Times-ի բիզնեսում ամենահաջողակ կանանց վարկանիշում զբաղեցրել է 36-րդ տեղը:

Սաուդյան Արաբիայում իշխանության եկած գահաժառանգ արքայազն Մուհամմեդ բին Սալմանը հայտարարել է երկրում բարեփոխումների քաղաքականության մասին, մասնավորապես՝ կանանց իրավունքների ընդլայնման ոլորտում: 2018 թվականի մարտին նա հայտարարել էր, որ սաուդցի կանայք կարող են ինքնուրույն որոշել՝ կրեն ավանդական հագուստը, թե ոչ, որի որոշ հատվածներ ամբողջությամբ փակում են մարմինն ու դեմքը: