Կարեն Կարապետյանի ճշմարտության պահը
Այսօր հասկանալի, ինչպես նաեւ դեռ անհասկանալի պատճառներով համակարգված գրոհ է սկսվել վարչապետի պաշտոնակատար Կարեն Կարապետյանի դեմ: Հետաքրքիրն այն է, որ այդ գրոհին ակտիվորեն մասնակցում են մարդիկ, ովքեր դեռ շաբաթներ, ամիսներ առաջ հիացմունքով էին խոսում նրա մասին:
Կարեն Կարապետյանը համաձայնեց վարչապետի պաշտոնը ստանձնել երկրի համար բավական ծանր իրավիճակում: Համաձայնվեց եւ կարողացավ իր խոսքով, գործով նպաստել ճգնաժամային իրավիճակի հաղթահարմանը: Այո, նրանից սպասելիքներն ավելի մեծ էին, նրանից ավելի մեծ նախաձեռնողականության սպասում կար, բայց եղավ այն՝ ինչ եղավ:
Հիմա կրկին երկրի համար բարդ վիճակում Կարեն Կարապետյանը բարդ առաքելություն է իր վրա վերցրել: Հիմա փոխանակ օգնենք նրան, դեռ մի բան էլ խանգարում, քարկոծում ենք: Չենք խոսում նրանց մասին, ովքեր չեն հասկանում ինչ է պետությունը, ինչ է միջպետական հարաբերությունները: Խոսում ենք նրանց մասին ովքեր գիտակցում են, բայց իրենց խոսքով եւ գործով հակառակն են անում:
Կարեն Կարապետյանը հսկայական պատասխանատվություն է վերցրել, եւ նա հենց դրա համար հարգանքի է արժանացել: Ի դեպ, հատուկ շեշտենք, որ նա բոլորովին էլ նպատակ չունի իշխանության գլխին պահել ՀՀԿ-ին: ՀՀԿ-ն իր դարն ապրեց: Կարեն Կարապետյանը հիմա ջանքեր է գործադրում հանուն երկրի կայունության եւ անցնցում առաջընթացի: Սա պետք է հասկանանք:
Արմեն Սիմոնյան