Միակ մարդը, որ Պուտինից չէր վախենում, Մերկելն էր. Օլանդը կիսվել է հիշողություններով
Ֆրանսիայի նախկին նախագահ Ֆրանսուա Օլանդը, որը 5 տարի կառավարել է երկիրը, նոր գիրք է գրել, որում կիսվել է իշխանության օրոք այլ առաջնորդների հետ շփումից ստացած տպավորություններով, հիշողություններով:
Ինչպես նշում է inopressa.ru-ն՝ Le Nouvel Observateur-ին հղումով, առավել ուշագրավ է Ռուսաստանի Դաշնության նախագահ Վլադիմիր Պուտինին վերաբերող հատվածը, որից կարելի է շատ բան իմանալ աշխարհի ամենաազդեցիկ առաջնորդներից մեկի մասին:
Օլանդն ընդգծել է, որ պաշտոնավարման ընթացքում, անշուշտ, ամենաբարդ հանդիպումն ունեցել է Պուտինի հետ:
«Նա ամրակազմ ու մինչև վերջ չանկեղծացող մարդ է, որը կարող է և՛ ջերմ ու ուշադիր, և՛ սառն ու դաժան լինել: Իր կապույտ աչքերի մի հայացքով նա միշտ ընդդիմանում է զրուցակցին՝ մերթ նրան հմայելով, մերթ ստիպելով զգուշանալ: Նա էքսպանսիվ, պայթուցիկ ծիծաղ ունի և ցինիկ մտքեր, իսկ ամենասուր բառերն արտասանում է անդրդվելի ձայնով»,-գրում է Օլանդը:
Նախկին ղեկավարի կարծիքով՝ միակ մարդը, ում Պուտինն ահ չէր ներշնչում, Գերմանիայի կանցլեր Անգելա Մերկելն էր:
«Նա (Մերկելը-Tert.am) նրան շուտվանից է ճանաչում ու գիտի նրա հետ խոսելու ձևը: Նա (Պուտինը-Tert.am) երբեք չի հրաժարվել Մերկելի վրա ճնշում գործադրելու փորձերից՝ երբեմն օգտագործելով սպառնալիքներ, հաճոյախոսություններ ու համատեղ հիշողություններ»,-պատմել է Օլանդը:
Նա վերհիշել է մի դրվագ, երբ Պուտինը Սոչիում հյուրընկալել է Մերկելին ու այնպես արել, որ նույն սենյակում գտնվեն նաև իր շները՝ չնայած շատ լավ իմացել է, որ Մերկելը դրանց չի սիրում:
Օլանդն ընդգծել է, որ Պուտինը «երկակի» մարդ է, որը կարող է և՛ բարի, և՛ չար լինել, ինչը, իհարկե, շփոթեցնող է:
Քաղաքական գործիչը նաև պատմել է 2014թ. Ելիսեյան պալատում տեղի ունեցած ուշագրավ դեպքի մասին, երբ Պուտինը հատուկ ֆրանսիացի գործընկերոջ հետ կենացներ խմելու համար իր հետ օղի էր բերել նախագահական նստավայր:
«Հայացքս ընկավ ջերմակայուն պայուսակի վրա, որը նա ձեռքում էր պահել: Հետո պարզեցի, որ դրա մեջ շշով օղի է, որը Պուտինն ուզում էր մեզ հետ խմել՝ նախապես վստահ լինելով, որ խմիչքն անհրաժեշտ ջերմաստիճան կունենա: Նա բազմաթիվ կենացներ ասաց՝ ռուս-ֆրանսիական բարեկամությունը գովերգելով»,-վերհիշել է Օլանդը:
Նա նաև պատմել է, որ դրանից մի քանի ամիս անց Պուտինից հազվագյուտ նվեր է ստացել. Նապոլեոն Բոնապարտի՝ ռուսական արշավի ընթացքում գրած նամակը:
«Ահա այսպիսին է ռուս ղեկավարը՝ զուսպ ու վճռական, անկանխատեսելի ու նրբանկատ: Նրան բավարարում է ներկայիս Եվրոպան, քանի որ այն թույլ է ու պառակտված: Նա հարգում է ուժը՝ այդ թվում նաև ԱՄՆ-ի, բայց միևնույն ժամանակ նա ցույց տվեց, որ որևէ միջոց չի խնայի ամերիկյան ժողովրդավարության սրտում տագնապի զգացողություն սերմանելու համար»,-եզրափակել է Ֆրանսիայի նախկին նախագահը: