«Կշարունակեմ կանգնել Արցախի կողքին անձրևի և արևի ժամանակ». ԵԽ պատգամավորի պատասխանը Բաքվին
Եվրախորհրդարանի անդամ Ֆրանկ Էնգելը, ում նկատմամբ սկսած միջազգային հետախուզման մասին հայտարարել էր Ադրբեջանի դատախազությունը, դեռ չգիտի, թե ինչ է անելու:
Tert.am-ի հետ զրույցում նա նշեց, որ շուտով իր անելիքները պարզ կլինեն:
«Ամեն դեպքում, ես պատրաստվում եմ ավելի շատ ժամանակ անցկացնել ազատ Արցախում»,- ասաց նա:
Հիշեցնենք, որ Ադրբեջանի գլխավոր դատախազության մամուլի քարտուղար Էլդար Սուլթանովը APA լրատվական գործակալությանը հայտնել է, որ միջազգային հետախուզում է հայտարարվել Եվրախորհրդարանի երեք անդամների՝ Ֆրանկ Էնգելի (Լյուքսեմբուրգ), Էլենի Թեոխարուսի (Կիպրոս) և Յարմիր Շտետինի (Չեխիա) նկատմամբ՝ Արցախում սահմանադրական հանրաքվեի ընթացքում դիտորդական առաքելություն իրականացնելու համար։
«Բանանային հանրապետության ավազակապետ ընտանիքը փորձում է ինձ սպառնալ՝ վիրավորելով իմ ինտելեկտը և իմ վճռականությունը: Ես կշարունակեմ կանգնել Արցախի կողքին «անձրևի և արևի ժամանակ»: Եվ, իհարկե, ես վերադառնալու եմ այնտեղ»,-ասել է նա։
ՀՀ մարդու իրավունքների պաշտպան Արման Թաթոյանն էլ, հղում անելով ՀՀ ոստիկանությանը ասել էր, որ ԵԽ պատգամավորները Ինտերպոլով հետախուզման մեջ չեն գտնվում. «Բաքվին չի հաջողվելու որևէ արդյունքի հասնել իր կեղծ տվյալներով»։