Ահազանգ. Աբովյանում նախկին ոստիկանի «հրահանգով» քարով խփել, սատկացրել են շանն ու նրա ձագերին (ֆոտո)
Հայաստանում թափառող կենդանիների անողոքաբար ոչնչացման պրակտիկան շարունակվում է արդիական մնալ: Եթե Երեւան քաղաքում թափառող կենդանիների խնդիրը քիչ թե շատ վերահսկելի է, ապա մայրաքաղաքից դուրս՝ մարզերում, կենդանիների վրա շարունակում են կրակել օրը ցերեկով հասարակական վայրում զենքի կիրառմամբ, հաղորդում է Econews.am-ը:
Նման անմարդկային դաժանության եւս մեկ դրսեւորման մասին EcoNews.am-ի խմբագրություն ահազանգել են Աբովյան քաղաքի մի քանի մտահոգ բնակիչներ: Պատմության կիզակետում օրենքի նախկին ներկայացուցիչ է՝ նախկին ոստիկան:
«Մեր բակում մի փոքր շունիկ էր ապրում, բնակիչներն էլ կերակրում էին: Վերջերս ձագեր ունեցավ: Բակում նաեւ նախկին ոստիկան է ապրում ու իր աղջիկը իբր վախեցել է այդ փոքր շնիկից: Հայրը կանչել է քաղաքապետարանից մեկին, եկել են քարով խփել են շանը, սատկացրել են, գցել են պարկը եւ նույնը ձագերի հետ են արել: Իմացա, որ ձագերից մեկին հարեւանները փրկել են, բայց նա խոստացել է նաեւ այդ ձագին սատկացնել»,- մեզ հետ զրույցում ասում է բնակիչներից մեկը:
Ըստ նրա, որոշ մարդկանց, որոնք փորձել են միջամտել, լռեցրել են ու սպառնացել: Մտահոգ բնակիչները նաեւ փորձել են քաղաքապետի հետ զրուցել, սակայն ժամեր շարունակ սպասելով նրան կարողացել են խոսել միայն օգնականի հետ:
«Բնականաբար, իրենց վրա չեն վերցնում: Լսեցի նաեւ, որ հաջորդ օրը նույնատիպ միջադեպ տեղի է ունեցել նաեւ Աբովյանի այլ թաղամասում: Մեզ հայտնի դարձավ, որ դա անողը կոմունալ բաժնի աշխատակից է եւ արծաթագույն «Ֆոլքսվագեն» է վարում»,- մանրամասնում է նա:
Մեր զրուցակիցը պնդում է, որ Աբովյան քաղաքում այսպիսի դեպքեր շատ են արձանագրվում: Անգամ վերացնում են ստերջացված շներին եւ դա նորմալ երեւույթ է դիտարկվում այնտեղ: Նշենք, որ Աբովյան համայնքի ղեկավարը Վահագն Գեւորգյանն է, ով համարվում է Գագիկ Ծառուկյանի վստահելի անձանցից մեկը: Վերջինս քաղաքապետ է ընտրվել 2015թ.-ին:
«Pro Paws» (Փրո Փոուզ) միջազգային բարեգործական կենդանապաշտպան կազմակերպության կրթական ծրագրի ղեկավար Կարինե Փանոսյանը մեզ հետ զրույցում մանրամասնում է, թե ինչ ազդեցություն կարող է ունենալ երեխաների վրա նման տեսարանների ականատես լինելը:
«Պատկերացրեք, որ քաղաքում սպանվում է կենդանի, իսկ երեխան առավոտյան պետք է գնա դպրոց: Դուրս է գալիս տնից ու տեսնում է՝ դռան առջեւ սպանված շուն: Այդ երեխան ի՞նչ ապրումներ կունենա: Նրան մոտ կարող են հոգեբանականից հոգեկան խնդիրներ առաջ գալ: Երկրորդ՝ այդ երեխայի մոտ ձեւավորվում է ագրեսիվ վերաբերմունք: Եթե նա տեսնում է արյունը եւ նա դա ծանր չի տանում եւ դա նույնիսկ դուր է գալիս երեխային, բնականաբար նրա մոտ էլ է ինչ-որ ագրեսիվ վերաբերմունք առաջանում: Այսինքն, դաստիարակչական տեսանկյունից եւ բարոյական տեսանկյունից սա լրջագույն խնդիր է:
Մենք պետք է հասկանանք՝ ինչ եղանակով պետք է կազմակերպենք այդ գործընթացը. կենդանիներին որսալը, նրանց վնասազերծելը: Եթե նույնիսկ կենդանին վտանգավոր է եւ նրան հասարակության մեջ թողնել չի կարելի, ապա նրան պետք է քնեցնել: Այս ամենը պետք է կազմակերպել այնպես, որ երեխաները չտուժեն: Ի վերջո վաղը այդ երեխան քաղաքացի է դառնալու եւ ինչ հոգեբանությամբ երեխան պետք է մեծանա, եթե նա գիշերը լսում է կրակոց, շան վնգստոց, ցավագին ոռնոցներ եւ առավոտյան տեսնում է սպանված կենդանուն արյունախառն ընկած դռան առջեւ»,- ասում է նա: