Դատարկ խոսալով ուժերի հավասարակշռություն չես պահի
«Լեռնային Ղարաբաղի խնդրի խաղաղ կարգավորման ուղղությամբ տեղի ունեցող բանակցություններում որևէ ճեղքում արձանագրելու հիմք այս պահին ես չեմ տեսնում: Այդ պարագայում Հայաստանի և Ադրբեջանի միջև ուժերի հավասարակշռության պահպանումը կայունության և փխրուն խաղաղության պահպանման միակ միջոցն է»: Սա Սերժ Սարգսյանի երեկվա ելույթից է․ մարդը վերջապես ջոկել ա։ Շատ ժամանակ չպահանջվեց, ընդամենը 9 տարի։
Էն, որ Ադրբեջանը Ռուսաստանից հարձակողական զենք էր ձեռք բերում, բանակցություններով էլ ժամանակ ձգում ու չէր համաձայնում Սերժ Սարգսյանի՝ Ղարաբաղը կես-կես հանձնելու առաջարկին, մարդիկ էլ հա ասում էին, որ պետք է պատրաստվել, արդիականացնել մեր բանակը, զինվել ու ակտիվացնել դիվանագիտական լծակներով Ադրբեջանին զսպելու աշխատանքները, տեղ չէր հասնում։ Այդ ժամանակ ինքն ավելի կարևոր գործերով էր զբաղված՝ հարստանում էր ու պլաններ գծում, թե ոնց 2018-ից հետո մնա իշխանության ղեկին։
Հիմա էլ, երբ մոտենում են ընտրությունները, եկել է ազգային-ազատագրական հայրենասիրական բաժակաճառերի ժամանակը։ Հետաքրքիր է, այդ ինչպե՞ս է Սերժ Սարգսյանը պատրաստվում պահել ուժերի հավասարակշռությունը, երբ Ադրբեջանը վերջին 5 տարիների ընթացքում 20 անգամ ավելի շատ զենք է գնել, քան Հայաստանը։ Երբ իր վարած տնտեսական քաղաքականության հետևանքով Հայաստանը դատարկվում է և խոշոր կապիտալը փախչում երկրից։
Եթե նա իսկապես մտահոգված լիներ մեր երկրի անվտանգությամբ, օր առաջ հրաժարական կտար։ Իսկ դատարկ խոսալով ուժերի հավասարություն չի պահվում։
Անդրանիկ Վարդանյանի ֆեյսբուքյան էջից