Թուրք-գերմանական հարաբերությունները նոր փուլում են. Մերկելն ու Յըլդըրըմը հանդիպել են Բեռլինում
Բեռլինում հանդիպել են Գերմանիայի կանցլեր Անգելա Մերկելն ու Թուրքիայի վարչապետ Բինալի Յըլդըրըմը, գրում է diken.com.tr կայքը:
Հայտնի է, որ հանդիպման բացումը կատարած Մերկելն առաջին հերթին հիշեցրել է գերմանական Welt թերթի թղթակից, Գերմանիայի քաղաքացի Դենիզ Յուջելի մասին՝ նշելով, որ նրա խնդիրը մեծ կարևորություն է ներկայացնում երկու երկրների հարաբերություններում:
Մերկելը նաև խոսել է Թուրքիայում օրենքի գերակայության, ժողովրդավարության ու իրավական պետության հիմնահարցերի հետ կապված խնդիրների, ինչպես նաև Թուրքիայի քաղաքացիների համար ազատականացված վիզային ռեժիմի հաստատման հնարավորությունների շուրջ:
«Գերմանիայում ապրում է թուրքական ծագումով 3 մլն քաղաքացի, նրանք յուրովի կամուրջ են հանդիսանում մեր երկու երկրների միջև: Այս համատեքստում շատ կարևոր է երկկողմ հարաբերությունների զարգացման համար փոխադարձ վստահության գործոնը», - ասել է նա:
Իր հերթին, Թուրքիայի վարչապետը հույս է հայտնել, որ թուրք-գերմանական լարվածությունն այլևս անցյալում է, և հայտարարել է, որ երկու երկրների հարաբերություններում այլևս նոր փուլ է մեկնարկել:
Անդրադառնալով թուրքական ԶՈւ-ի կողմից Սիրիայի Աֆրին շրջանում ձեռնարկված ռազմական գործողությանը՝ Յըլդըրըմը նշել է, որ Թուրքիան այս քայլով պաշտպանում է ահաբեկչությունից ոչ միայն իր, այլև ՆԱՏՕ-ի սահմանները:
Նա նաև բացատրել է, որ լրագրող Դենիզ Յուջելի՝ մեղադրական ակտի մինչ օրս պատրաստ չլինելու և կալանքի տակ մնալով դատարանի առաջ չկանգնելու պատճառը հեղաշրջման փորձից հետո արդարադատության ոլորտում հազարավոր գործերի քննման հետևանքով առաջացած ծանրաբեռնվածությունն է և խնդրել է ըմբռնումով մոտենալ հարցին:
Նշենք, որ նախօրեին Յըլդըրըմը հույս էր հայտնել, որ Յուջելը, որը մեկ տարուց ավելի է՝ գտնվում է թուրքական բանտում, շուտով ազատ կարձակվի: