ԱՄՆ-ն չեղարկում է մահմեդական երկրների «սև ցուցակը»
ԱՄՆ ներքին անվտանգության նախարարությունից հայտնել են, որ Վաշինգտոնը հրաժարվում է 11 երկրից փախստականների մուտքի ամբողջական արգելքի պրակտիկայից: Դրա փոխարեն սահմանվում է առավել մանրակրկիտ ստուգումների պրակտիկան, հայտնում է Deutsche Welle-ն:
Հիշեցնենք, որ 2017 թվականի հոկտեմբերին ԱՄՆ-ն վերսկսել է փախստականների ընդունման ծրագիրը՝ բացառություն անելով 11 երկրի համար, որտեղից փախստականները «երկրի ազգային անվտանգության համար սպառնալիք» էին ներկայացնում:
Համաձայն փախստականների իրավունքների պաշտպանության կազմակերպությունների տեղեկության՝ խոսքը Եգիպտոսի, Իրանի, Իրաքի, Լիբիայի, Մալիի, Հյուսիսային Կորեայի, Սոմալիի, Հարավային Սուդանի, Սուդանի, Սիրիայի և Եմենի մասին է: Բացի ԿԺԴՀ-ից՝ բոլոր այդ երկրները մահմեդական են:
ԱՄՆ ներգաղթյալների մուտքի սահմանափակումը Դոնալդ Թրամփի հիմնական նախընտրական խոստումներից էր: Նախագահի պաշտոնին անցնելուց ի վեր նա մի քանի միգրացիոն հրամանագիր է ստորագրել, որոնք մասնավորապես արգելել են երկիր մուտքը առավելապես մահմեդական բնակչություն ունեցող վեց երկրների քաղաքացիների համար: