Թուրքիան ու Ռուսաստանը նոր պայմանավորվածությո՞ւն ունեն
Թուրքիայի նախագահի խոսնակ Իբրահիմ Քալընը հերքել է լուրերն այն մասին, թե Թուրքիայի և Ռուսաստանի միջև գոյություն ունի սիրիական Աֆրինի և Իդլիբի «փոխանակման» մասին պայմանավորվածություն, գրում է թուրքական gazeteduvar.com.tr կայքը:
Նշենք, որ Աստանայի բանակցությունների շրջանակում Ռուսաստանի, Իրանի և Թուրքիայի միջև ձեռք բերված պայմանավորվածության համաձայն, որով կողմերը Սիրիան բաժանեցին մի քանի անվտանգության գոտու, թուրքական ԶՈւ-ն դիտորդական հենակետեր ունի Իդլիբում: Նույն պայմանավորվածության շրջանակում Աֆրինում դիրքավորված ռուս զինվորականները թուրքական ԶՈւ-ի՝ Աֆրինի ռազմական գործողությունը սկսելուց առաջ նախնական համաձայնությամբ դուրս եկան տարածքից՝ բախումներից խուսափելու համար:
Ավելի ուշ մամուլում լուրեր տարածվեցին, որ Ռուսաստանն ու Թուրքիան գաղտնի պայմանավորվածություն ունեն, որի համաձայն Թուրքիան ռուսական կողմին կհանձնի Իդլիբի դիրքերը՝ Աֆրինի փոխարեն:
«Ռուսաստանի հետ գաղտնի «առևտուր» չկա, այսինքն՝ Իդլիբը տանք, Աֆրինը վերցնենք, նման բան չկա», - ասել է Քալընը հեռուստահաղորդումներից մեկի ժամանակ:
Նա հավելել է, որ Աֆրինի գործողության հարցով Թուրքիան ակտիվ դիվանագիտական կապի մեջ է մի շարք երկրների հետ, հատկապես՝ Ռուսաստանի, ԱՄՆ-ի ու Ֆրանսիայի:
«Երբ ես գալիս էի այստեղ՝ հարգելի նախագահը հեռախոսազրույց էր վարում (ՌԴ նախագահ Վլադիմիր) Պուտինի հետ: Վաղն էլ (ԱՄՆ նախագահ Դոնալդ) Թրամփի հետ է խոսելու: Մեր արտգործնախարարն էլ թեմայի շուրջ քննարկումների համար Ֆրանսիա է գնում: Որևէ մեկը կասկածի տակ չի դնում մեր ռազմական գործողության օրինականությունը, Թուրքիան ունի իր սահմանները պաշտպանելու իրավունք», - ասել է Քալընը:
Հիշեցնենք, որ հունվարի 20-ին թուրքական ԶՈւ-ն սկսել է Սիրիայի հյուսիսում գտնվող քրդական ազգային զինված ջոկատների (PYD/YPG) դեմ ռազմական գործողությունը, որը ստացել է «Ձիթենու ճյուղ» անվանումը: Օդային առաջին հարձակումներից հետո, հունվարի 21-ին թուրքական ԶՈւ-ի զինվորականներն անցել են լայնամասշտաբ հարձակման նաև ցամաքում: Հայտնի է, որ թուրքական ԶՈւ-ին աջակցում է «Սիրիական ազատ բանակ» ընդդիմադիր խմբավորումը՝ ինչպես 2016թ.-ին ձեռնարկված «Եփրատի վահան» գործողության ժամանակ: