Ավստրալական ABC-ն պատմել է սիրիահայ արծաթագործի մասին
Ավստրալական ABC-ն պատմել է Սիրիայում քաղաքացիական պատերազմի պատճառով Ավստրալիա արտագաղթած հայ ոսկերիչի մասին:
Բայրամյանը արծաթագործությամբ էր զբաղվում Սիրիայի Հալեպ քաղաքում: Ընտանիքում այս արհեստով զբաղվել են բոլորը՝ դեռ մեծ պապից սկսած: 14 տարեկանից Բայրամյանը աշխատել է իր հորեղբոր արհեստանոցում: 2002 թվականին Հալեպում իր սեփական խանութն էր բացել, որը, սակայն, ոչնչացվել էր պատերազմի ժամանակ: Ավոյի ընտանիքը Բեյրութ էր տեղափոխվել, այնտեղից՝ Ավստրալիա:
Ավստրալիայում Ավետիքին հաջողվել է գտնել իր երազանքի աշխատանքը: Այժմ Ավոն աշխատում է Ավստրալիայում արծաթե իրերի արտադրության վերջին ավանդական արհեստանոցում: W.J. Sanders արհեստանոցի սեփականատերը Դենիս Դե Մուտն է: Այն հիմնադրվել է բրիտանացի միգրանտի կողմից 1911 թվականին: Դե Մուտը գնահատել է Ավոյի արհեստն ու նրան աշխատանքի ընդունել: «Ավոյի աշխատանքներն ուղղակի հիանալի են: Նա նոր հմտություններ է ներմուծում: Մենք մեկ նոր եւ երկու ավագ աշակերտ ունենք: Շատ կարեւոր է, որ բիզնեսը զարգանա եւ Ավոյի նման մարդիկ սովորեցնեն երիտասարդներին», - նշել է արհեստանոցի սեփականատերը:
Արհեստանոցի պատվերներից մեկը Ավստրալիայի թենիսի հաջորդ բաց առաջնության գավաթն է:
«Չեք պատկերացնի, թե որքան դժվար էր թողնել մեր ողջ կյանքն ու գալ այստեղ աշխատանք փնտրելու: Բայց եթե մարդը սիրում է իր աշխատանքը, ապա ջանասիրաբար աշխատում եւ հաջողության է հասնում»,- նշել է Բայրամյանը:
Նրա հինգ տարեկան դուստրը՝ Լուրդը, արդեն սկսել է հետաքրքրություն ցուցաբերել ընտանեկան գործի նկատմամբ: «Ես տեսնում եմ, որ նա դիզայնի տաղանդ ունի: Սա առաջին բանն է, որ անհրաժեշտ է այս գործում»,- նշել է Ավետիք Բայրամյանը: