Գաֆէսճեան պատանեկան խորհրդի` «Սինեսթեզիա․ բազմազգայական փորձառություն» ինտերակտիվ ցուցադրությունը

«Սինեսթեզիա․ բազմազգայական փորձառություն» ինտերակտիվ ցուցադրությունը տեղի կունենա Գաֆէսճեան արվեստի կենտրոնի «Սասունցի Դավիթ» պարտեզի սրահում։

Ցուցադրությունը ներառում է տարբեր մեդիաներով արված աշխատանքներ՝ վիդեո, ինստալացիա, գրաֆիկա, քանդակ, ինտերակտիվ աշխատանքներ, որոնք առաջարկում են զգալ ոչ միայն ներկայությունը, այլև բացակայությունը՝ լռությունը, մթությունը, անտեսանելին։

Ստեղծագործությունները միավորում են ձայնը, գույնը, ձևը, նյութը, հոտն ու հիշողությունը՝ վերածելով դրանք անձնական և բազմազգայական փորձառության։ Այս տարածքում դիտողը դառնում է մասնակից, նա լսում է առանց տեսնելու, տեսնում է առանց լսելու, շոշափում է և պատկերացնում։

Պատանեկան խորհրդի տասնինը անդամների կողմից նախաձեռնված «Սինեսթեզիա․ բազմազգայական փորձառություն» նախագիծը հրավիրում է վերանայելու մեր սովորական ընկալումը և բացելու այն նուրբ սահմանները, որտեղ սկսում է աշխատել զգացողության այլ լեզուն։