Ինչի՞ց են մահանում Հայաստանում․ մահացության հիմնական պատճառները՝ նոր վիճակագրությամբ

2026 թվականի հունվար-մայիս ամիսներին Հայաստանում գրանցված մահերի ավելի քան կեսի պատճառը սրտանոթային հիվանդություններն են եղել։Այդ մասին են վկայում Վիճակագրական կոմիտեի հրապարակած նախնական տվյալները։

Տվյալ ժամանակահատվածում հանրապետությունում գրանցվել է 10 հազար 493 մահ, որոնցից 5 հազար 486-ը կամ 52.3 տոկոսը պայմանավորված են եղել արյան շրջանառության համակարգի հիվանդություններով։ Թեև դրանք շարունակում են մնալ մահացության գլխավոր պատճառը, նման դեպքերի թիվը նախորդ տարվա նույն ժամանակահատվածի համեմատ նվազել է 6.4 տոկոսով՝ 5 հազար 860-ից հասնելով 5 հազար 486-ի։

Մահացության երկրորդ հիմնական պատճառը նորագոյացություններն են։ 2026 թվականի առաջին հինգ ամիսներին դրանց հետևանքով մահացել է 2 հազար 237 մարդ, ինչը 6 տոկոսով ավելի է, քան նախորդ տարվա նույն ժամանակահատվածում։ Արդյունքում նորագոյացությունների մասնաբաժինը մահացության ընդհանուր կառուցվածքում աճել է՝ 18.9 տոկոսից հասնելով 21.3 տոկոսի։

Շնչառական օրգանների հիվանդություններից մահացել է 1 հազար 38 մարդ՝ նախորդ տարվա 1 հազար 201-ի փոխարեն։ Այս պատճառով մահերի թիվը մեկ տարվա ընթացքում նվազել է 13.6 տոկոսով։

Միաժամանակ զգալի նվազում է գրանցվել վարակիչ և մակաբուծային հիվանդություններից մահացության դեպքերում։ Եթե 2025 թվականի հունվար-մայիսին նման հիվանդությունների հետևանքով մահացել էր 135 մարդ, ապա 2026 թվականի նույն ժամանակահատվածում՝ 63, ինչը շուրջ 53 տոկոսով պակաս է։

Մարսողական օրգանների հիվանդություններից մահացության դեպքերը փոքր աճ են արձանագրել՝ 550-ից հասնելով 562-ի, իսկ հիվանդացության և մահացության արտաքին պատճառներից գրանցված մահերի թիվը կազմել է 325՝ նախորդ տարվա 340-ի դիմաց։

Ընդհանուր առմամբ, 2026 թվականի հունվար-մայիսին Հայաստանում գրանցվել է 10 հազար 493 մահ, ինչը 708-ով կամ 6.3 տոկոսով պակաս է նախորդ տարվա նույն ժամանակահատվածի ցուցանիշից։

Top-news