Մշակութային վերածնունդ Դիլիջանում. առաջին համերգը կնվիրվի կոմպոզիտոր Արամ Խաչատրյանին

Green Rock բարեգործական և Դասական երաժշտության զարգացման հիմնադրամները ստորագրել են հուշագիր՝ Դիլիջանում մշակութային գործունեություն սկսելու համար։ Գործակցության հիմնական նպատակը քաղաքի երբեմնի մշակութային կարգավիճակը վերականգնելն է։

Դիլիջանին վերադարձնել մշակութային մայրաքաղաքի կարգավիճակը։ Սա Green Rock բարեգործական և Դասական երաժշտության զարգացման հիմնադրամների ստորագրած հուշագրի հիմնական նպատակներից մեկն է։ Ստորագրման վայրը պատահական չի ընտրվել։  Գործակցության սկիզբը դրվում է Արամ Խաչատրյանի տուն  թանգարանում։

Արամ Խաչատրյան տուն թանգարանի տնօրեն Արմինե Գրիգորյան․

«Խորհրդանշական է այն փաստը, որ առաջին նախագիծը նվիրվում է  Արամ Խաչատրյանին և իր հետևորդներին՝ Հայկական կոմպոզիտորական հնգյակին ։ Ուրախ եմ, որ այս կարևոր և հրաշալի գործակցության մեկնարկի անմիջական մասնակիցն եմ լինելու»։

Դիլիջանում մշակութային խոշոր նախագծեր իրականացնելու գաղափարը վաղուց էր հասունացել։ Դասական երաժշտության զարգացման հիմնադրամի տնօրեն, ջութակահար Կարեն Շահգալդյանն ասում է, որ Green Rock հիմնադրամի հետ գործակցությունը հնարավորություն է տվել սկսելու այն ծրագիրը, որն ուղղված է քաղաքի մշակութային կյանքի աշխուժացմանն ու մշակութային տուրիզմի զարգացմանը․

«Դիլիջանը եղել է մշակութային մայրաքաղաք, մենք ուզում ենք վերադարձնել այդ  կարգավիճակը։ Շատ պլաններ ունեմ, ուզում եմ այնտեղ կազմակերպենք ամենամյա փառատոն։ Ուզում ենք, որ այդ  վայրը նորից սկսի լիաթոք շնչել, ինչպես խորհրդային տարիներին էր, երբ այնտեղ գալիս էին համաշխարհային դասական երաժշտության աստղերը»։

Հիմնադրամի տնօրեն Եկատերինա Բրեդիխինան ասում է, որ Դիլիջանում  մինչև այս նախաձեռնությունը սոցիալական և կրթական ծրագրեր են իրականացրել, հիմա փորձում են լրացնել մշակութային միջոցառումների բացը․

«Այս նոր նախաձեռնությունը միտված է մշակութային տուրիզմի զարգացմանը, այն հնարավորություն կտա զբոսաշրջիկներին քաղաքում մնալ ավելի երկար ժամանակով»:

Առաջին համատեղ համերգը տեղի կունենա հուլիսի 15-ին Հայաստանի կոմպոզիտորների միության աջակցությամբ՝ Կոմպոզիտորների տան Բեթհովենի անվան համերգասրահում։

Այն նվիրված է լինելու Արամ Խաչատրյանին և «Հայկական հնգյակի» կոմպոզիտորներին։ Ելույթ կունենան ջութակահար Կարեն Շահգալդյանը, դաշնակահար, Արամ Խաչատրյանի տուն-թանգարանի տնօրեն Արմինե Գրիգորյանը և թավջութակահար Լևոն Առաքելյանը․

«Ֆենոմենալ ակուստիկայով համերգասրահը կարող է հյուրընկալել մինչև 500 հանդիսատեսի․ մենք ակնկալում հանդիսատես նաև Դիլիջանից, Երևանից, Իջևանից ու Վանաձորից»:

Երաժշտական երեկոյի ընթացքում կբացվի նաև հայ կոմպոզիտորներին նվիրված լուսանկարչական ցուցահանդես։