Պենտագոնի ղեկավարը չեղյալ է հայտարարել իր այցը Իսրայել

ԱՄՆ պատերազմի նախարար Փիթ Հեգսեթը չեղյալ է հայտարարել չորեքշաբթի Իսրայել այցը՝ Իրանի հետ լարվածության սրման պատճառով, հաղորդում է CNN-ը՝ հղում անելով իսրայելական աղբյուրներին։

Նրանց տվյալներով՝ Հեգսեթը պետք է կատարեր իր առաջին պաշտոնական այցը Իսրայել՝ հանդիպելու վարչապետ Բենիամին Նեթանյահուի և պաշտպանության նախարար Իսրայել Կացի հետ։ Նա նաև պլանավորել էր այցելել Իսրայելի ռազմաօդային ուժերի բազաներ։ Այցը չեղյալ է հայտարարվել չորեքշաբթի առավոտյան՝ չնայած արդեն իսկ իրականացվող նախապատրաստական ​​աշխատանքներին, նշել են աղբյուրները։

Հեգսեթի այցի նպատակներից մեկն էր փարատել Իսրայելի մտավախությունները՝ Թուրքիային հինգերորդ սերնդի F-35 անտեսանելի կործանիչների հնարավոր վաճառքի կապակցությամբ, որի մասին ԱՄՆ նախագահ Դոնալդ Թրամփը հայտարարել էր Անկարայում ընթացող ՆԱՏՕ-ի գագաթնաժողովի ժամանակ:

Իսրայելը Մերձավոր Արևելքի միակ երկիրն է, որն այժմ իր ռազմաօդային ուժերի կազմում ունի ամերիկյան այս ժամանակակից կործանիչը:

CNN-ի հետ Նեթանյահուն հայտարարել է, որ Իսրայելը կտրականապես դեմ է Թուրքիային F-35 կործանիչներ վաճառելուն։ «Թուրքիան ագրեսիվ ձգտումներ ունի... Այն խաղաղությանն ու կայունությանը նպաստող ուժ չէ,- ասել է նա և հավելել.- ես դա չէի անի»։

Իսրայելի վարչապետը կրկնել է, որ ԱՄՆ-ի կողմից F-35 կործանիչների մատակարարումը «կխախտի ուժերի հավասարակշռությունը Մերձավոր Արևելքում»։