Դոնալդ Թրամփի շնորհած զանգվածային ներումները չեն տարածվում ինքնաշեն ռումբեր տեղադրած քաղաքացու վրա

Ֆեդերալ դատավորը վճռել է՝ ԱՄՆ Կապիտոլիումը գրոհած կողմնակիցներին նախագահ Դոնալդ Թրամփի շնորհած զանգվածային ներումները չեն տարածվում Դեմոկրատական և Հանրապետական կուսակցությունների ազգային կենտրոնակայանների մոտ ինքնաշեն ռումբեր տեղադրած քաղաքացու վրա։

Ֆեդերալ օկրուգային դատավոր Ամիր Ալին հրաժարվել է կարճել Բրայան Ջ. Քոուլ կրտսերի դեմ հարուցված գործը՝ եզրակացնելով, որ հունվարի 6-ի անկարգությունների մասնակիցներին Թրամփի շնորհած ներումները բացառապես տարածվում էին հունվարի 6-ի հարձակման հետ կապված հանցագործությունների համար դատապարտված անձանց վրա:

Քոուլին մեղադրանք չէր առաջադրվել, էլ չասած դատավճռի կայացման մասին, երբ Թրամփը հրապարակեց այդ ներումները, նշել է Ալին իր երեք էջանոց որոշման մեջ:

Սպիտակ տանն իր պաշտոնավարման երկրորդ ժամկետի հենց առաջին օրը Թրամփը դադարեցրեց Արդարադատության նախարարության պատմության մեջ ամենախոշոր քրեական հետաքննությունը՝ ներում շնորհելով, մեղմացնելով բանտային պատիժները և հրամայելով կարճել գործերը հունվարի 6-ի հարձակման մեջ մեղադրվող բոլոր ավելի քան 1500 անձանց նկատմամբ:

Քոուլը ձերբակալվել է Թրամփի կողմից իրականացված ներման լայնածավալ ակտից գրեթե մեկ տարի անց: Նա մեղադրվում է անկարգությունների նախորդ գիշերը Վաշինգտոնում Հանրապետական ազգային կոմիտեի և Դեմոկրատական ազգային կոմիտեի կենտրոնակայանների մոտ երկու ինքնաշեն ռումբ տեղադրելու մեջ: