Վենեսուելայում շարունակվում են որոնողափրկարարական աշխատանքները, զոհերի թիվն ավելանում է

Վենեսուելայում հունիսի 24-ին տեղի ունեցած հզոր երկրաշարժերի զոհերի թիվը վերջին մեկ օրում ավելացել է ևս 300-ով՝ հասնելով 2595-ի, հայտարարել է երկրի նախագահի պաշտոնակատար Դելսի Ռոդրիգեսը։ Եվս 12000 մարդ վիրավորվել է։ Ռոդրիգեսը չի նշել անհայտ կորածների թիվը։ Ըստ ոչ պաշտոնական աղբյուրների՝ անհատ կորած է համարվում 38 500 մարդ։

Որոնողափրկարարական աշխատանքները շարունակվում են։ Երկրաշարժի 8-րդ օրը փլատակներից հաջողվել էր ողջ դուրս բերել 43-ամյա մի տղամարդու։

Երկրաշարժից ամենաշատը տուժել է մայրաքաղաքից ոչ հեռու գտնվող Լա Գուայրայի նահանգը։ Ռոդրիգեսը հայտնել է, որ Լա Գուայրայի գրեթե բոլոր պաշտոնյաները զոհվել են երկրաշարժի հետևանքով։ Ըստ Վենեսուելայի իշխանությունների՝ փլուզվել է մոտ 800 շենք, որից 189-ը լիովին ավերվել են։

Իշխանությունները դատապարտում են տարերային աղետին դանդաղ արձագանքելու վերաբերյալ քննադատությունները։ ՄԱԿ-ի Զարգացման ծրագրի հաշվարկով՝ երկրաշարժերի պատճառած վնասը կարող է կազմել 6,7 միլիարդ դոլար։

Երկրաշարժից հետո Վենեսուելային օգնություն են ուղարկել բազմաթիվ երկրներ։ ԱՄՆ-ն մարդասիրական օգնությունը հնարավոր դարձնելու համար չեղարկել է երկրի դեմ գործող որոշ պատժամիջոցներ, խոստացել է տրամադրել 150 միլիոն դոլարի հումանիտար օգնություն, ինչպես նաև այնտեղ է ուղարկել ավելի քան 900 փրկարար։